დღეს, 9 ივლისს, ჩვენი დროით 23:00 საათზე, მსოფლიო საკლუბო ჩემპიონატის ნახევარფინალში რეალ მადრიდი პარის სენ-ჟერმენს დაუპირისპირდება. შეგახსენებთ, "სამეფო კლუბსა" და პსჟ-ს შორის მოგებული მუნდიალის ფინალში ლონდონის ჩელსის შეხვდება.
კილიან მბაპე VS ხვიჩა კვარაცხელია
ეს იქნება მბაპეს პირველი დაპირისპირება ყოფილ გუნდთან, მას შემდეგ რაც ის რეალში გადავიდა. საინტერესოა, რომ პარის სენ-ჟერმენი, როგორც მეტოქე, ფრანგი ფორვარდისთვის ერთ-ერთი ყველაზე უხერხულია. პსჟ ერთადერთი კლუბია მის გზაზე, რომლის წინააღმდეგ ჩატარებულ მინიმუმ 4 შეხვედრაში კილიანმა ერთი ბურთიც კი ვერ შეაგდო.
მადრიდელთა თავდამსხმელი "ლურჯ-წითლებს" დაუპირისპირდა მაშინ, როდესაც ის მონაკოში თამაშობდა. მოგვიანებით, ის თავადაც გადმოვიდა პარკ დე პრენსზე, სადაც "სამეფო კლუბის" ამჟამინდელი მე-9 ნომერი გუნდის ისტორიაში ყველა დროის საუკეთესო გოლეადორი გახდა.
"დონატელომ" პარის სენ-ჟერმენში დაწერა დაუვიწყარი ისტორია, თუმცა ჩემპიონთა ლიგაზე გამარჯვება მან ვერ მოახერხა. დედაქალაქურმა კლუბმა ეს 26 წლის ფორვარდის ბერნაბეუზე გადასვლის შემდეგ შეძლო. პსჟ-ს ამ ყველაფერში დაეხმარა მოთამაშე, რომელიც ამჟამად სწორედ მბაპეს 7-ნომრით ბრწყინავს.
საუბარია ხვიჩა კვარაცხელიას შესახებ, რომელიც ლურჯ-წითელი მაისურის ჩაცმიდან სულ რაღაც რამდენიმე თვეში ტრებლს დაეუფლა. ქართველი ვინგერის შემდეგი სატიტულო სამიზნე არის საკლუბო მუნდიალი და ამისთვის მას ლუის ენრიკეს გუნდში თავის წინამორბედთან მოგება სჭირდება.
ლუის ენრიკე და მადრიდის რეალი
ენრიკესთვის რეალთან დაპირისპირება ყოველთვის პრინციპული და განსაკუთრებულია. ბარსელონაში გადასვლამდე, საფეხბურთო კარიერის დიდი ნაწილი ესპანელმა შუახაზელმა სწორედ მადრიდში გაატარა. რაც შეეხება მის სამწვრთნელო მოღვაწეობას, ევროპის ყველაზე ტიტულოვან კლუბთან წაგებაზე ხშირად (3), ლუჩო მხოლოდ მადრიდის ატლეტიკოსა და ბილბაოს ატლეტიკთან დამარცხებულა (4).
პარის სენ-ჟერმენის ამჟამინდელმა მწვრთნელმა საფრანგეთში შექმნა მონსტრი, რომელიც მთელი ევროპის მასშტაბით ვერავინ შეაჩერა. მონსტრის შექმნის გამოცდილება აქვს 55 წლის სპეციალისტის მეტოქესაც, ჩაბი ალონსოს. ყველას გვახსოვს, თუ როგორ მოიგო მან გერმანიის ჩემპიონატი ლევერკუზენის ბაიერთან ერთად წაუგებლად.
დღეს, ესპანელი მწვრთნელი "სამეფო კლუბშია", სადაც კარლო ანჩელოტის მოღვაწეობის შემდეგ, მისი პირდაპირი მისია ახალი ეპოქის დაწყება არის. ბერნაბეუს ბინადრების დამრიგებელი ახლოს არის მიზანთან, მაგრამ საამისოდ მას პსჟ-ს სახით ევროპის უძლიერეს კლუბთან მოგება სჭირდება.
