დღეს, 29 აპრილს, ჩვენი დროით 23:00 საათზე გაიმართება ჩემპიონთა ლიგის პირველი ნახევარფინალური დაპირისპირება - პარის სენ-ჟერმენი ლონდონის არსენალს ესტუმრება. განვიხილოთ ყველაფერი საინტერესო აღნიშნული შეხვედრის გარშემო.
არსენალი V პსჟ (23:00)
პირველად 2007 წლის შემდეგ, ქართველი ფეხბურთელი ჩემპიონთა ლიგის ნახევარფინალში თამაშობს. 18 წლის წინ, ეს გააკეთა კახა კალაძემ მილანთან ერთად, რომელმაც მოუგო მანჩესტერ იუნაიტედს, ბოლოს კი ლივერპულს. დღეს, ყურადღების ცენტრში უკვე ხვიჩა კვარაცხელია არის.
პარის სენ-ჟერმენმა ჩემპიონთა ლიგის ფინალის მიმავალ გზაზე პლეიოფში ჩააბარა ორი ინგლისური გამოცდა - თავდაპირველად მერსისაიდელებთან, შემდეგ კი ბირმინგემის ასტონ ვილასთან. ვნახოთ, რა იქნება არსენალთან, რომელიც შეიძლება ითქვას, რომ პსჟ-ს ყველაზე უხერხული მეტოქე არის.
საქმე ისაა, რომ ლონდონური გუნდი არის ერთადერთი, რომელთანაც პარიზმა ჩაატარა ორზე მეტი მატჩი, თუმცა გამარჯვება ვერასდროს მოიპოვა. უფრო კონკრეტულად კი პარკ დე პრენსის ბინადრებმა "მეთოფეებთან" სხვადასხვა დროს ითამაშეს 5-ჯერ: 2 წაგება და 3 ფრე, ასეთია ფრანგული კლუბის სტატისტიკა.
ლუის ენრიკეს გუნდმა ემირეიტსის ბინადრებთან ითამაშა მიმდინარე სეზონშიც, ჩემპიონთა ლიგის ფაზაზე, როდესაც ინგლისურმა გუნდმა 2:0 მოიგო. პარის სენ-ჟერმენს იმ დროს ჯერ კიდევ არ ჰყავდა ქართველი ვინგერი, რომლის გადმოსვლის შემდეგ, ფრანგული კლუბი სულ სხვანაირად ათამაშდა.
იმ დროს ვერავინ წარმოიდგენდა, რომ პსჟ შესაძლოა ოთხ საუკეთესო გუნდს შორის აღმოჩენილიყო. რაც შეეხება გუნდების დანაკლისს, პარიზის შემადგენლობა ოპტიმალურია, მიკელ არტეტა კი დგას სერიოზული თავსატეხის წინაშე, რადგან მის განკარგულებაში რამდენიმე მოთამაშე არ იქნება.
არსენალს დღეს არ ეყოლება გაბრიელ ჟეზუსი, ჟორჟინიო ფრელო, კაი ჰავერცი, ტომას პარტეი, გაბრიელ მაგალიაესი და ტაკეჰირო ტომიასუ. ასევე საეჭვოა მიკელ მერინოსა და ბენ უაიტის თამაშიც. აქვე დავამატებთ, რომ ენრიკეს გუნდსა და ლონდონელებს შორის მოგებული ფინალში ბარსელონასა და მილანის ინტერს შორის გამარჯვებულს შეხვდება.
