ჩემპიონთა ლიგის ოთხშაბათის მატჩის დღე და მისი ცენტრალური დაპირისპირება - ბარსელონა პარის სენ-ჟერმენის წინააღმდეგ. განვიხილოთ, თუ რას უნდა ველოდოთ ამ შეხვედრისგან.
ბარსელონა V პარის სენ-ჟერმენი
არსებობს მოსაზრება, რომ ბარსელონასა და პარის სენ-ჟერმენს ჩემპიონთა ლიგის გასული სეზონის ფინალში უნდა ეთამაშათ. მთავარ დაპირისპირებამდე კატალონიელები არ მიუშვა მილანის ინტერმა, რომელიც მოგვიანებით პსჟ-სთან განადგურდა. დღეს, ამ ორ კლუბს შორის აღარავინ დგას.
გასული სეზონის არშემდგარი ფინალის სცენარის ხილვა მაინც ვერ მოხერხდება, რადგან "ლურჯ-წითლებს" არაერთი წამყვანი ფეხბურთელი აკლიათ. თავად განსაჯეთ: მარკინიოსი, დემბელე, რუისი, ვიტინია, კვარაცხელია, ნევეში დუე...ლუის ენრიკეს მისთვის კარგად ნაცნობ "ბლაუგრანასთან" შეხვედრა მათ გარეშე მოუწევს.
ოპტიმალური შემადგენლობა არც კამპ ნოუს ბინადრებს ჰყავთ, ლაზარეთში არიან ტერ შტეგენი, რაფინია, გავი, ფერმინი, ბალდე და მეკარე გარსია. ჰანსი ფლიკისთვის სასიხარულოდ და პარკ დე პრენსის ბინადრებისთის სამწუხაროდ, ტრავმირებულ მოთამაშეებს შორის ლამინ იამალი აღარ ირიცხება.
რაც შეეხება ამ მატჩის ისტორიულ კონტექსტს, პარის სენ-ჟერმენი ჩემპიონთა ლიგის მოქმედი გამარჯვებულის რანგში ბარსელონას პირველად ხვდება. იქამდე იყო 15 თამაში: 6-ჯერ მოიგეს კატალონიელებმა, 5-ჯერ - პსჟ-ს მოთამაშეებმა, 4-ჯერ მათ შორის ფრეც დაფიქსირდა. ისტორიას ახსოვს 3 შეხვედრა, როცა "ლურჯ-წითლებმა" გაიტანეს 4 ბურთი, მაგრამ "ბლაუგრანას" 6-იც გაუტანია.
როგორც გვახსოვს, სწორედ 4:0-ის პასუხი გამოდგა კამპ ნოუს ბინადრებისგან 6:1, რვა წლის წინანდელ ეპიკურ დუელში. ენრიკე იმ დროს მუშაობდა სწორედ ბარსაში, დღეს კი ის პარკ დე პრენსზეა და გამოსარჩევია ისიც, რომ ყოფილ კლუბთან მოგების გამოცდილება მას უკვე აქვს.
ჩემპიონთა ლიგის ოთხშაბათის მატჩის დღე
| დრო | მატჩი |
| 20:45 | სენტ-ჟილი - ნიუკასლი |
| 20:45 | ყარაბაღი - კოპენჰაგენი |
| 23:00 | ბარსელონა - პსჟ |
| 23:00 | ვილიარეალი - იუვენტუსი |
| 23:00 | მონაკო - მანჩესტერ სიტი |
| 23:00 | დორტმუნდი - ბილბაო |
| 23:00 | არსენალი - ოლიმპიაკოსი |
| 23:00 | ნაპოლი - სპორტინგი |
| 23:00 | ლევერკუზენი - პსვ |
