კვირის მატჩის დღეს არაერთი პრინციპული და საინტერესო დაპირისპირება გაიმართება. პრემიერ ლიგაში, არსენალი საკუთარ კედლებში მიიღებს მანჩესტერ იუნაიტედს, კალჩოში კი ვიხილავთ იუვენტუსი-ნაპოლისა და რომა-მილანის დუელს. მივყვეთ ყველაფერს თანმიმდევრობით.
არსენალი V მანჩესტერ იუნაიტედი | 20:30
ამ მატჩს ორივე გუნდი კარგ განწყობაზე ხვდება. არსენალი ლიდერობს როგორც ჩემპიონთა ლიგის ფაზის სატურნირო ცხრილს, ისე პრემიერ ლიგასაც. გამოსარჩევია ლონდონელთა 12-თამაშიანი წაუგებელი სერია, რომელიც 11 დეკემბერს დაიწყო. დროის აღნიშნულ შუალედში "მეთოფეებმა" მოუგეს ინტერს, ჩელსისა და ასტონ ვილას.
როგორც აღვნიშნეთ, კარგი განწყობა მან იუნაიტედშიც სუფევს. რუბენ ამორიმის წასვლის შემდეგ, გუნდი მიმდინარე სეზონის ბოლომდე ჩაიბარა მაიკლ კერიკმა, რომელმაც თავის პირველ შეხვედრაში მანჩესტერულ დერბიში მეზობელ სიტის დამაჯერებლად მოუგო. ვნახოთ, რას იზამენ "წითელი ეშმაკები" ემირეიტსზე.
ეს იქნება ამ გუნდების რიგით 225-ე მატჩი, იქამდე - 95-ჯერ იმარჯვეს ოლდ ტრაფორდის ბინადრებმა, 81-ჯერ - არსენალის ფეხბურთელებმა, 48 შეხვედრა ფრედ დასრულდა. ლონდონელების კარში იუნაიტედის მაისურით 12 ბურთი შეაგდო უეინ რუნიმ, რაც ამ დუელის რეკორდული შედეგია.
საჩემპიონო მნიშვნელობის მატჩები სერია A-ში
როგორც აღვნიშნეთ, ტურინის იუვენტუსი საკუთარ კედლებში მიიღებს ნაპოლის, მილანი კი რომას ესტუმრება. იმის მიუხედავად, რომ აღნიშნული ტურის შემდეგ, ლიდერი კალჩოში არ შეიცვლება, რადგან ინტერნაციონალემ თავისი შეხვედრა უკვე მოიგო, ორივე თამაში საჩემპიონო მნიშვნელობის არის.
მილანური გუნდის უახლოესი მდევარი არის თანაქალაქელი "როსონერი", რომელიც "ჯალოროსისთან" გამარჯვების შემთხვევაში, სერია A-ს ლიდერთან სხვაობას 3 ქულამდე შეამცირებს. სატურნირო ცხრილში იქვე ახლოს არიან "პარტენოპეი", თავად "მგლები", "ბიანკონერი" და კომო. დიახ, ევროპის მთავარი საკლუბო ტურნირის საგზურისთვის ბრძოლაში "ბიანკობლუც" არის.
კვირის მატჩის დღე
| ატლეტიკო - მალიორკა | 17:00 | ლა ლიგა |
| კრისტალ პალასი - ჩელსი | 18:00 | პრემიერ ლიგა |
| ბარსელონა - ოვიედო | 19:15 | ლა ლიგა |
| მეცი - ლიონი | 20:15 | ლიგა 1 |
| არსენალი - მანჩესტერ იუნაიტედი | 20:30 | პრემიერ ლიგა |
| იუვენტუსი - ნაპოლი | 21:00 | სერია A |
| რომა - მილანი | 23:45 | სერია A |
| დეპორტივო - რასინგი | 23:55 | ლა ლიგა 2 |
