[მატჩის დღე] ცენტრალური შეხვედრა პრემიერ ლიგაში, კვარაცხელია, მიქაუტაძე და კვირის სხვა საინტერესო თამაშები

პრემიერ ლიგის პირველი ტურის ცენტრალური შეხვედრა დღეს გაიმართება. საუბარია ლონდონის ჩელსისა და მანჩესტერ სიტის დაპირისპირებაზე. "ქალაქელები" არის გუნდი, რომელმაც პრემიერ ლიგა ბოლო 7 წელში 6-ჯერ მოიგო, "არისტოკრატებმა" კი ბოლო 2 წელში, არც მეტი არც ნაკლები, 35 ტრანსფერი განახორციელეს.

ცნობისთვის, "ლურჯების" შენაძენი 35 ტრანსფერის უკან იყო ემერიკ ლაპორტი, ექვსი წლის წინ. პრემიერ ლიგის წინა სეზონის მსგავსად, მთავარი ფავორიტი კვლავ პეპ გუარდიოლას გუნდი იქნება. რაც შეეხებათ "პენსიონერებს", ჯერჯერობით სრულიად გაურკვეველია ის, თუ რას უნდა ველოდოთ ამ კრებულისგან.

კილიან მბაპეს დებიუტი მადრიდის რეალის რიგებში უეფას სუპერთასზე შედგა, დღეს ის უკვე ლა ლიგაში ითამაშებს. მოქმედი ჩემპიონების მოწინააღმდეგე მალიორკა იქნება. ბერგამოს ატალანტასთან მატჩმა და "სამეფო კლუბის" ვარჯიშებმა აჩვენა, რომ ფრანგ ფორვარდსა და მის ახალ თანაგუნდელებს შორის ქიმია უკვე არის.

ქართველი გულშემატკივრისთვის სერია ა-ში დღეს ყველაზე საინტერესო რამ მოხდება - ნაპოლის პირველი შეხვედრა ჩემპიონატში ანტონიო კონტეს ხელმძღვანელობით. იტალიელი ტაქტიკოსისთვის ხვიჩა კვარაცხელია ხელშეუხებელია და ის აუცილებლად ძირითადში იქნება. ვნახოთ, როგორ ითამაშებს ქართველი ვინგერი ახალ დამრიგებელთან, ახალ სქემაში.

გუშინ, თავისი შეხვედრა სენტ-ეტიენის რიგებში ჩაატარა ზურიკო დავითაშვილმა, დღეს კი ასპარეზზე გიორგი მიქაუტაძე გამოდის. მისი ლიონი გასვლაზე ეთამაშება რენს, გუნდს, რომელიც ზაფხულში ასევე დაინტერესებული იყო ქართველი ფორვარდით. ყველა მოუთმენლად ველით ახალგაზრდა გოლეადორის ოფიციალურ დებიუტს მშობლიური ოლიმპიკის შემადგენლობაში.

კვარაცხელიასა და მიქაუტაძის შესახებ უკვე ვისაუბრეთ, გადავხედოთ ქართველი ფეხბურთელების სხვა შეხვედრებსაც. გერმანიის თასზე თავის თამაშს ჩაატარებს კარლსრუე, მაგრამ უცნობია იქნება თუ არა მოედანზე ბუდუ ზივზივაძე, რომელმაც რამდენიმე დღის წინ ვარჯიშზე ტრავმა მიიღო. ქართველი ფორვარდი "ლურჯების" კარის დარაჯს დაეჯახა.

ლა ლიგა 2-ში ლევანტე, რომლის ერთ-ერთი ლიდერი გიორგი ქოჩორაშვილია, ხიხონს ესტუმრება. საინტერესო შეხვედრები იქნება სერია ბ-შიც, ლუკა ლოჩოშვილისა და დაჩი ლორთქიფანიძის კრემონეზეს გასვლითი მატჩი ელის კოზენცასთან, გიორგი კვერნაძის ფროსინონე კი გენუის სამპდორიას მიიღებს.

კოპენაჰგენი, რომლის რიგებში გადავიდა გიორგი გოჩოლეიშვილი სახლში მიიღებს ვიბორგს, გიორგი აზაროვი დონეცკის შახტართან ერთად ესტუმრება ლივი ბერეჰს, სანდრო ალთუნაშვილის ვოლფსბერგერი კი - ალტახს. მატჩების სრული განრიგი შეგიძლიათ იხილოთ ქვემოთ.

18:00 - კოპენჰაგენი-ვიბორგი

19:00 - ხიხონი-ლევანტე

19:30 - ჩელსი-მანჩესტერ სიტი

20:00 - ლოტე-კარლსრუე

20:30 - ვერონა-ნაპოლი

22:30 - ფროსინონე-სამპდორია

22:30 - კოზენცა-კრემონეზე

22:45 - კალიარი-რომა

22:45 - რენი-ლიონი

23:30 - მალიორკა-რეალი