მატჩის დღე - ტური, რომელმაც სასკუდეტო ბრძოლაში შესაძლოა მნიშვნელოვანი როლი ითამაშოს

კვირის მატჩის დღის ცენტრალურ დაპირისპირებაში სერია ა-ს პირველადგილოსანი, მილანის ინტერი საკუთარ კედლებში რომას მიიღებს. განვიხილოთ, თუ რას უნდა ველოდოთ აღნიშნული შეხვედრისგან.

ინტერი V რომა | 22:45

ორივე გუნდი ბოლო პერიოდში კრიზისს განიცდის. ჩემპიონთა ლიგაზე ბოდო გლიმტთან მარცხის შემდეგ, ინტერმა ისე ჩაამთავრა მარტის თვე, რომ 1 შეხვედრაც ვერ მოიგო. "ნერაძურიმ" წააგო უახლოეს კონკურენტთანაც, მეზობელ მილანთან, რომელთანაც სხვაობა 6 ქულამდე შემცირდა.

სამი ფრე და ერთი მარცხი - ასეთი მარტი გამოუვიდათ "გველებს". სერია ა-ს პირველადგილოსანის წარუმატებლობა პირველ რიგში წამყვანი მოთამაშეების ტრავმებს უკავშირდება. საუბარია ჰაკან ჩალჰანოღლუზე, ლაუტარო მარტინესსა და დენზელ დუმფრისზე. ჯუზეპე მეაცას ბინადრებისთვის საბედნიეროდ, სამივე მათგანი მწყობრშია უკვე.

კარგი პერიოდი არც რომას უდგას. კრისტიან კივუს გუნდის მსგავსად, ევროთასებს დედაქალაქელებიც დაემშვიდობნენ. საუბარია მარცხის შესახებ ბოლონიასთან, ევროპის რანგით მე-2 საკლუბო ტურნირის 1/8 ფინალში. "ჯალოროსის" მიზანია 4-ეულში შესვლა, მაგრამ ამ მხრივ კონკურენტი უკვე არა მხოლოდ ტურინის იუვენტუსია, არამედ კომოც.

"მგლები" მარტში დამარცხდნენ სამ მეტოქესთან, მათ შორის "ბიანკობლუსთან", რომელთან ჩამორჩენაც ამ დროისთვის სამ ქულას შეადგენს. რაც შეეხება ოლიმპიკოს ბინადრების დღევანდელ მოწინააღმდეგეს, პირველ წრეში მინიმალურად მოიგო სწორედ ინტერნაციონალემ და ეს იყო ის იშვიათი შემთხვევა, როცა კალჩოს ლიდერმა პრინციპული მეტოქე დაამარცხა.

ეს არ არის ერთადერთი დიდი დაპირისპირება სერია ა-ს 31-ე ტურში. ხვალ, 6 აპრილს, თანაქალაქელი მილანური გუნდისგან ექვს ქულაში მყოფი "როსონერი" ნაპოლის ესტუმრება. როგორც ვხედავთ, საკმაოდ მაღალია იმის ალბათობა, რომ დღევანდელმა და ხვალინდელმა შეხვედრებმა სასკუდეტო ბრძოლაში მნიშვნელოვანი როლი ითამაშონ.

კვირის მატჩის დღე