მატის დე ლიხტის საფეხბურთო გზა საინტერესო მოვლენებით არის სავსე. ახალგაზრდა ცენტრალური მცველი თავისი კარიერის ყოველ სეზონს ახალი დამრიგებლით იწყებს. თავად განსაჯეთ: ნიდერლანდელმა უკანახაზელმა დიდ ფეხბურთში პირველი ნაბიჯები გადადგა 2016/17 წლების სეზონში, ამსტერდამის აიაქსში, რომლის იმდროინდელი თავკაცი პეტერ ბოსი იყო.
შემდეგ სეზონში "ებრაელების" მწვრთნელად დაინიშნა მარსელ კაიზერი, თუმცა ახალ სეზონში ის ერიკ ტენ ჰაგმა შეცვალა. დიახ, ნიდერლანდელი თავკაცი კრუიფ არენაზე მუშაობდა 4 წელი, მაგრამ მისი ახალგაზრდა შეგირდი 1 წლის შემდეგ, ტურინის იუვენტუსში გადავიდა.
"ბიანკონერის" ყოფილმა ცენტრალურმა მცველმა სამი სეზონის განმავლობაში იმუშავა მაურიციო სარისთან, ანდრეა პირლოსა და მასიმილიანო ალეგრისთან. შემდეგ, 25 წლის უკანახაზელის კარიერაში იყო მიუნხენის ბაიერნი: 2 სეზონი, 2 დამრიგებელი - იულიან ნაგელსმანი და ტომას ტუხელი.
ბუნდესლიგაში დარჩენის შემთხვევაშიც კი, "რეკორდმაისტერის" ყოფილი ოთხიანი დაიწყებდა მორიგ სეზონს ახალ თავკაცთან - ვენსან კომპანისთან. ალიანც არენაზე დარჩენა, როგორც ვიცით, არ გამოვიდა: დე ლიხტი მანჩესტერ იუნაიტედში გადავიდა. იქ მას დახვდა ნაცნობი ტენ ჰაგი, მაგრამ დიდი ხნით არც ის გაჩერებულა.
სეზონის დაწყებიდან სამ თვეში, "წითელმა ეშმაკებმა" ნიდერლანდელი მწვრთნელი გაათავისუფლეს და რუბენ ამორიმი დანიშნეს. როგორც ვიცით, ოლდ ტრაფორდზე აღარც პორტუგალიელი თავკაცი მუშაობს, რაც ნიშნავს იმას, რომ მატისი შემდეგ სეზონს კვლავ ახალ დამრიგებელთან დაიწყებს.
მატის დე ლიხტის მწვრთნელები ყოველი სეზონის სტარტზე
| პეტერ ბოსი | 2016/17 | აიაქსი |
| მარსელ კაიზერი | 2017/18 | აიაქსი |
| ერიკ ტენ ჰაგი | 2018/19 | აიაქსი |
| მაურიციო სარი | 2019/20 | იუვენტუსი |
| ანდრეა პირლო | 2020/21 | იუვენტუსი |
| მასიმილიანო ალეგრი | 2021/22 | იუვენტუსი |
| იულიან ნაგელსმანი | 2022/23 | ბაიერნი |
| ტომას ტუხელი | 2023/24 | ბაიერნი |
| ერიკ ტენ ჰაგი | 2024/25 | მანჩესტერ იუნაიტედი |
| რუბენ ამორიმი | 2025/26 | მანჩესტერ იუნაიტედი |
