აქსელ ტუანზებე თავის მშობლიურ გუნდს, მანჩესტერ იუნაიტედს სასამართლოში უჩივის. ფეხბურთელის უკმაყოფილების მიზეზი - ხერხემლის ტრავმა, რომელსაც "წითელი ეშმაკების" სამედიცინო პერსონალი წლების განმავლობაში ყურადღებას არ აქცევდა. კონგოელი უკანახაზელის თქმით, ოლდ ტრაფორდზე მომუშავე ექიმებმა მისი კარიერა დაანგრიეს.
ირკვევა, რომ მანჩესტერის ყოფილმა ცენტრალურმა მცველმა ხერხემლის ტრავმა მიიღო ჯერ კიდევ 2020 წელს, თუმცა კლუბის ექიმებმა ახალგაზრდა მოთამაშე ქირურგიულ გამოკვლევაზე არც კი გადაამისამართეს. 28 წლის უკანახაზელის მძიმე დაზიანება აღმოაჩინეს ნეაპოლელმა ექიმებმა, როცა ფეხბურთელი მათი ქალაქის კლუბში იჯარით გადავიდა.
აღნიშნული ტრავმის გამო, იუნაიტედის ყოფილმა 38-ე ნომერმა "პარტენოპეიში" ორ მატჩზე მეტის ჩატარება ვერ მოახერხა. ინგლისური კლუბის ექიმებმა ხერხემლის დაზიანება აღმოაჩინეს მხოლოდ 3 წლის შემდეგ და ტუანზებეს დაუნიშნეს შესაბამისი მკურნალობაც, მაგრამ თავად მოთამაშის თქმით, უკვე გვიანი იყო.
"წითელი ეშმაკების" შემდეგ, კონგოელი ცენტრალური მცველი გადავიდა იფსვიჩ თაუნში, შემდეგ კი ბარნლიში. ფეხბურთელი თავისი მშობლიური კლუბისგან კომპენსაციის სახით 1 მილიონ ფუნტს ითხოვს. ცნობისთვის, აქსელის შემთხვევა არ არის პირველი, ოლდ ტრაფორდზე მომუშავე ექიმებს სხვადასხვა დროს აკრიტიკებდნენ ოუენ ჰარგრივზი, რომელუ ლუკაკუ, ფილ ჯონსი, ლიუკ შოუ და ჯორჯ ბესტიც კი.
