იური ტაბატაძის ესპანური კარიერა ზღაპრულად დაიწყო - კადისის შემადგენლობაში მან მხოლოდ 2 მატჩი ჩაატარა, ორივე ჯერზე შეცვლაზე შევიდა და ჯამში 40 წუთში 3 გოლი გაიტანა.
კადისში ფეხბურთი ძალიან უყვართ და თუ გულშემატკივრები ქართველის ტრანსფერს პესიმისტურად უყურებდნენ, ახლა შეხედულება შეეცვალათ და ტაბატაძე მათი საყვარელი ფეხბურთელი გახდა.
LaGazzetta.ge-სთან ინტერვიუში 25 წლის შემტევმა ესპანური კარიერის დასაწყისზე, გოლის ემოციებსა და სამომავლო მიზნებზე ისაუბრა.
"კადისში ჩამოსვლის პირველივე დღიდანვე ვგრძნობ აქაური ქომაგების გვერდში დგომას, უამრავი წერილი შემომდიოდა, წარმატება მისურვეს, გუნდშიც კარგად დამხვდნენ და მეც ადაპტავია მარტივად გავიარე. საერთოდ არ მაგრნობინებენ, რომ ახალი მოსული ვარ და ყველანაირად გვერდში მიდგანან. თანაგუნდელები ხუმრობით ილია თოფურიას მეძახიან. რასაც აქამდე ვოცნებობდი და მინდოდა, რომ ჩემს ცხოვრებაში ყოფილიყო, ახლა არის ზუსტად ეს პერიოდი. ყველანაირი პირობაა, რომ ჩემი შესაძლებლობები გამოვავლინო"
კადისში სულ რამდენიმე ვარჯიში ჩაატარე და უცებ, პირველივე მატჩში, ბოლო წუთზე გამარჯვების გოლი გაიტანე...
"დიახ, გუნდთან ერთად ბევრი ნავარჯიშები არ მქონდა და იმედი მქონდა, რომ პირველ მატჩს 5-10 წუთს მაინც მათამაშებდა. ისე მოხდა, რომ ჩვენმა შემტევმა პირველ ნახევარში ტრავმა მიიღო და მწვრთნელმა გასახურებლად გამიშვა. ვიფიქრე, ეგრევე შევყავართქო და მოტივაცია მომეცა, თუმცა ასე არ მოხდა და სხვა მოთამაშე შეიყვანა. 85-ე წუთია და მწვრთნელმა მითხრა, შედიხარო. ვფიქრობდი, რომ შევალ 1-2-ჯერ მაინც შევეხო ბურთსთქო. უცებ მეკარესთან ერთი-ერთზე აღმოვჩნდი, ბევრი აღარ მიფიქრია და გავიტანე."
რა გითხრა მწვრთნელმა მატჩის შემდეგ?
"სანამ მოედანზე შევიდოდი, მითხრა, რომ ზურგს უკან შერბენები გააკეთე, რადგან გოლი გვაქვს გასატანიო, თამაშის შემდეგ კი მე მივედი და შანსითვის მადლობა გადავუხადე."
თუ პირველ მატჩში გოლი მეტოქის შეცდომით გაიტანე, მეორე მატჩში დუბლი შენივე ინდივიდუალიზმის ხარჯზე შეასრულე...
"მეორე მატჩში, მოედანზე რომ შევედი, 2-3 ბურთი დავკარგე და ჩემს თავს შემოვუძახე, ასე არ უნდა გაგრძელებულიყო და კონცენტრაციით მეთამაშა. ისე მოხდა, რომ მომენტები შემექმნა და გამოვიყენე. თავი ზღაპარში მეგონა. მესამეს გატანაც მინდოდა, მაგრამ არ გამოვიდა.
თან, შენი მატჩის მიმდინარეობისას, საქართველოს საკალათბურთო და საფეხბურთო ნაკრებები თამაშობდნენ. ალბათ, ცალი თვალი აქეთ გქონდა.
"პირველი ტაიმი რომ მორჩა, ტელეფონი ჩუმად ავიღე, რათა ანგარიშები მენახა. ჩვენს კალათბურთელებს საფრანგეთისთვის უკვე მოგებული ჰქონდათ, საფეხბურთო ნაკრებიც ბულგარეთს ამარცხებდა და ესეთი კარგი დღე რომ იყო, ვიფიქრე, საქართველოს დღეა და თუ შევალ ამ დღეს კიდევ უფრო გავალამაზებ და მეც გავიტანთქო. ჩვენი ნაკრებების წარმატებამ მოტივაცია მომცა და დუბლი შევასრულე."
ეს სამივე გოლი კადისის გულშემატკივრებთან ერთად აღნიშნე. როგორ ატმოსფერია კადისის საშინაო მატჩებზე?
"ჩემი გოლების გულშემატკივრებთან ერთად აღნიშვნა იქიდან წამოვიდა, რომ როგორც ვთქვი, პირველივე დღიდან მათგან სითბოს ვგრძნობდი და ჩემდაუნებურად, გოლის გატანის შემდეგ, მინდოდა ეს სიხარული მათთვის მიმეძღვნა. სტადიონზე საოცარი ატმოსფეროა და ხოლმე და აქ ფეხბურთი უყვართ.
2 კვირაა, რაც ესპანეთში თამაშობ, რას გვეტყვი ამ ჩემპიონატზე?
"მოძრავები არიან და ტექნიკურები. ვიცით, რომ ესპანელები ტექნიკური თამაშით გამოირჩევიან, მაგრამ თუ მენტალურად კარგად ხარ, მათი თამაშის სტილისთვის ალღოს აღება რთული არ არის."
ეს არის მეორე შემთხვევა, როცა ლეგიონერი ხარ. პირველ ჯერზე სლოვაკეთში წახვედი და ყველაფერი გეგმის მიხედვით არ წავიდა. გააანალიზე თუ არა მიზეზები, რის გამოც იქ ფეხი ვერ მოიკიდე, რაც უკვე ესპანეთში თავის გამოსაჩენად დაგეხმარება?
"სიმართლე გითხრათ, სლოვაკეთში რომ მივდიოდი, იმ მოტივით წავედი, რომ ოღონდ სადმე წავსულიყავი და როგორც ჩანს, ამისთვის მზად არ ვიყავი. ჩემი გუნდი სულ დაცვით ფეხბურთს თამაშობდა და თავის გამოჩენის საშუალებაც არ მომეცა. სამომავლო გეგმებიც არ იყო, ესპანეთში კი სულ სხვა გარემო დამხვდა, გუნდს მიზნად ლა ლიგაში გადასვლა აქვს, თავს ისე ვგრძნობ, როგორც საკუთარ სახლში და ყველაფერი მაიდვილდება. როცა გაგრძნობინებენ, რომ საჭირო მოთამაშე ხარ, შენც საქმეს სხვანაირი მოტივაციით უდგები.
კადისში ბევრი გამოცდილი ფეხბურთელი თააშობს, გაქვს მათთან კომუნიკაცია?
"ჩვენთან გამოცდილი სუსო თამაშობს, ასევე ალექს ფერნანდესი - ნაჩოს ძმა. ალექსთან ხშირი კომუნიკაცია მაქვს ხოლმე და რჩევებს მაძლევს. მეუბნება, რომ ჩემს თავზე ბევრი უნდა ავიღო და აქაურობას შევეჩვიო. გვყავს მცველი ბოიანი, რომელიც ამ ჩემპიონატში მოთამაშე მცველების სუსტ მხარეებზე მიყვება ხოლმე."
ესპანელი გულშემატკივრების გარდა, ამ წარმატებული მატჩების შემდეგ, დადებითი ემოციები ქართველი გულშემატკივრებისგანაც წამოვიდა.
"ქართველი გულშემატკივრებისგან უამრავი შეტყობინება და მოლოცვა შემომდის, ამით ძალიან ბედნიერი ვარ და მეც ვცდილობ, იმედები გავუმართლო. ჩემი ოჯახის წევრებიც ძალიან გახარებულები არიან და ყველაფერს კითხულობენ. ეს ორმაგ მოტივაციას მაძლევს."
საუბრის დასაწყისში ილია თოფურია ახსენე. ალბათ, ილია კადისშიც ძალიან უყვართ...
"პირველივე დღიდან, გუნდში თოფურიას მეძახიან, თან ცოტა აგრესიული აღნაგობა მაქვს და მოჩხუბარი ვგონივარ (იცინის). თოფურია აქაც ძალიან უყვართ და ყველამ იცის, თუ რა დიდი სპორტსმენია."
რას უნდა ველოდოთ იური ტაბატაძისგსან მომავალ მატჩებში?
"ჩემი მიზანია, რომ ასე გავაგრძელო, ვივარჯიშო და უფრო მაღალ დონეზე წარმოვაჩინო თავი. 25 წლის ვარ და მეგონა, რომ ესპანეთში ან ასეთი დონის ლიგაში თამაში შეუძლებელი იქნებოდა, თუმცა ჩემი შრომა დაფასდა და დღეს აქ ვარ."
