დღეს საქართველოს კალათბურთელთა ნაკრებმა ევრობასკეტზე მეოთხე მატჩი გამართა და მეორე გამარჯვება იზეიმა. ჩვენი გუნდი ლიმასოლში ევრობასკეტის ერთ-ერთ მასპინძელ კვიპროსის ნაკრებს დაუპირისპირდა და 61:93 გაიმარჯვა.
მატჩის საწყისი წუთები ქულა-ქულაში წარიმართა, პირველი მეოთხედი საქართველოს ნაკრებმა მინიმალური ანგარიშით 13:15 მოიგო. მეორე მეოთხედში საქართველოს ნაკრებმა უპირატესობა გაზარდა და დამაჯერებლად დაწინაურდა. პირველ ტაიმში ქართველებმა 23 სამქულიანი ისროლეს და 10 ზუსტად გამოიყენეს, პირველი ნახევარი ჩვენმა გუნდმა 26:42 მოიგო.
მესამე მეოთხედში ქართველთა დომინირება გაგრძელდა, რაც უცვლელი იყო დასკვნით მეოთხედშიც და საბოლოოდ, ჩვენმა გუნდმა დიდი სხვაობით, 61:93 გაიმარჯვა.
ქართველთაგან საუკეთესო შედეგი თორნიკე შენგელიამ დააფიქსირა, 27 ქულა, 4 მოხსნა, 4შედეგიანი გადაცემა, 21 ქულა ჰქონდა გოგა ბითაძეს, 10 კი დუდა სანაძემ დააგროვა.
საქართველოს ნაკრებმა ევროპის ჩემპიონატი სენსაციური გამარჯვებით დაიწყო, ესპანეთს 83:69 მოუგო. ხმაურიანი სტარტის შემდეგ, ჩვენმა გუნდმა იტალიასთან 78:62 და საბერძნეთთან 53:94 წააგო. ამჯერად კი მეორე გამარჯვება იზეიმა.
აღნიშნულ მატჩამდე დღეს C ჯგუფის ერთი შეხვედრა გაიმართა, სადაც საქართველოს უშუალო კონკურენტმა, ბოსნია და ჰერცეგოვინამ ჯგუფის ლიდერს, საბერძნეთის ნაკრებს 77:80 მოუგო. დღეს C ჯგუფის კიდევ ერთი მატჩი იტალიასა და ესპანეთს შორის 22:30 საათზე დაიწყება.
იმისთვის რომ საქართველოს ნაკრებმა ჯგუფური ეტაპი დაძლიოს, რამდენიმე ვარიანტის განხილვა შეიძლება, თუმცა თეორიული დაშვებების გარეშე, ბოსნია და ჰერცეგოვინასთან გამარჯვების შემთხვევაში საქართველო პლეი-ოფში აუცილებლად გავა.
საქართველოს ნაკრები ჯგუფური ეტაპის დასკვნით შეხვედრას 4 სექტემბერს, ბოსნია და ჰერცეგოვინას ნაკრებთან გამართვას. მატჩი თბილისის დროით, 16:00 საათზე დაიწყება.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით ასპარეზობს და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
