ზამთრის სატრანსფერო ფანჯრის პერიოდში მილანს სამედიცინო საკითხების გამო ჩაეშალა მორიგი გარიგება - ჟან-ფილიპ მატეტას გაფორმება. ფრანგმა ფორვარდმა ვერ გაიარა შემოწმების პირველი ეტაპი, რის შემდეგაც მას ჩაენიშნა უფრო სიღრმისეული გამოკვლევა, რომელმაც დაადგინა შემტევის მუხლის ტრავმის სიმძიმე.
ეს არ არის პირველი შემთხვევა, როდესაც "როსონერი" უკვე თითქმის გაფორმებულ ფეხბურთელზე უარს ამბობს. ყველაფერი დაიწყო 2000-იანების დასაწყისში, ფერნანდო რედონდოს მადრიდის რეალიდან "დიავოლოში" ტრანსფერით. ლეგენდარულ შუახაზელზე იყო უდიდესი მოლოდინი, მაგრამ არგენტინელმა საყრდენმა დროის უმეტესი ნაწილი სან სიროს ბინადრების სამედიცინო ცენტრში გაატარა.
პირველივე ვარჯიშებზე გამოჩნდა, რომ "სამეფო კლუბის" ყოფილ ვიცე-კაპიტანს ჰქონდა კუნთის ტრავმასთან დაკავშირებული პრობლემები, შემდეგ, მან დაიზიანა მუხლები და რეაბილიტაციაზე ჯამში 838 დღე დახარჯა. "ელ პრინჩიპე" მილანში ირიცხებოდა 4 წელი (2000-2004) და დროის აღნიშნულ შუალედში მან მხოლოდ 33 შეხვედრის ჩატარება მოასწრო.
სანტიაგო ბერნაბეუს ბინადრების ყოფილი ექვსიანის წარუმატებელი ტრანსფერით განრისხებულმა სილვიო ბერლუსკონიმ "როსონერიში" მოგვიანებით შექმნა ახალი სამედიცინო ცენტრი, MilanLab-ი, რომელიც თანამედროვე ტექნიკისა და წამყვანი სპეციალისტების დახმარებით მოთამაშეების ფიზიკური მდგომარეობის დეტალურ გამოკვლევას ემსახურებოდა.
ამ ყველაფრის შედეგად, "ილ დიავოლო" სატრანსფერო ბაზარზე პრაქტიკულად არ უშვებდა შეცდომას, თუმცა ერთი გაუთვალისწინებელი გადაცდომა მაინც მოხდა. საუბარია ალეშანდრე პატოს ტრანსფერზე. ლაბორატორია მოგვიანებით დაიხურა, მაგრამ მემკვიდრეობა დარჩა: სან სიროს ბინადრები მოთამაშეების კონდიციებს დღემდე დეტალურად იკვლევენ.
ამ მიზეზის გამო, მილანში სხვადასხვა დროს ვერ მოხვდნენ ალი სისოკო, ჯონათან ბიაბიანი, ენტონი რობერტსონი, მარკ პუბილი და ვიქტორ ბონიფეისი. ბოლო ასეთი შემთხვევა, როგორც აღვნიშნეთ მოხდა ცოტა ხნის წინ, კრისტალ პალასის ფორვარდის მიმართებაში.
