უკვე ცნობილი ფაქტია, რომ მილანი ახალ სტადიონს სან-დონატოში აიშენებს. მეზობლებს არ ჩამორჩა ინტერიც, რომელიც "ახალი სახლის" აშენებას როცანოს ტერიტორიაზე გეგმავს. ეს ფაქტი La Gazzetta dello Sport-ს ოფიციალურად დაუდასტურა კომპანია Viale della Liberazione-ს დირექტორმა, ალესანდრო ანტონელომ.
"ვაგრძელებთ მუშაობას როცანოს ტერიტორიაზე და როდესაც ყველა ტექნიკურ-ეკონომიკური საკითხი იქნება გავლილი, ჩვენს პროექტს ადმინისტრაციას წარვუდგენთ", - განაცხადა იტალიელმა დეველოპერმა. ფიქრები სან სიროს შესახებ ნელ-ნელა წარსულში რჩება და ქალაქის მერია უკვე ბჭობს იმის შესახებ, თუ რა აშენდება ლეგენდარული არენის ადგილზე.
"ნერაძურის" მიზანია თანამედროვე, მრავალფუნქციური კომპლექსის შექმნა, რომელიც 70 ათას ადამიანზე იქნება გათვლილი. ეს ყველაფერი მოაზრებულია მწვანე ზონაში, საზოგადოებისთვის მოსახერხებელ ადგილზე, უამრავი მაღაზიით, კვების ობიექტებითა და ა.შ.
ამ პროექტში, "შავ-ლურჯების" პარტნიორები არიან შემდეგი კომპანიები:
Legend (კომერციული და მარკეტინგული მხარე), Populous (არქიტექტურული მხარე), Goldman Sachs (ფინანსური მხარე), Cbre/Wepartner (უძრავი ქონების საბაზრო ღირებულების შეფასება). სიაში ასევე ფიგურურებს კომპანია Infrafin-ი, რომელმაც ახალი არენის აშენებისთვის Suning Holdings Group-ს 256 000 კვადრატული მეტრი გამოუყო.
რაც შეეხება ტრანსპორტირების საკითხს, ინტერნაციონალეს გულშემატკივრები ახალ სტადიონზე მივლენ ორი მარშრუტით: 1) ქალაქის დასავლეთ ნაწილიდან მიმავალი გზით; 2) გენუის მიმართულებით მიმავალი ავტომაგისტრალით. თუ რაიმე გაუთვალისწინებელი არ მოხდა, მილანელთა არენის აშენება 2025 წლის პირველ ნახევარში დაიწყება.
ეს ნიშნავს იმას, რომ "ნერაძურის" ახალი სტადიონი 2028-2029 წლების სეზონისთვის უკვე მზად იქნება. რაც შეეხება "ახალი სახლის" ვიზუალურ მხარეს, გეგმაშია ოვალური ფორმის ნაგებობა, რომელიც ტოტენჰემის არენას მოგვაგონებს. დამტკიცებული ჯერჯერობით არაფერია, მაგრამ Viale della Liberazione-ს უფროსობა პროექტის მიმართ პოზიტიურადაა განწყობილი.
