საქართველოს კალათბურთელთა ნაკრები ევრობასკეტისთის მასპინძელ ლიმასოლში ემზადება, ჩვენმა გუნდმა დღეს კვიპროსში მეორე ვარჯიში ჩაატარა.
კვლავ კითხვის ნიშნის ქვეშაა ითამაშებს თუ არა ესპანეთთან საქართველოს ნაკრების კაპიტანი თორნიკე შენგელია. კაპიტანმა დღეს გამართული ვარჯიშის შემდეგ, ჯანმრთელობის მდგომარეობისა და ფიზიკური მზაობის შესახებ ისაუბრა:
"რაც შეეხება ჯანმრთელობას, ასეთი რამ პირველადა დამემართა,გულთან დაკავშირებით, პრობლემა არასდროს არ მქონია, ყველაფერი რიგზეა, ახლა დამოკიდებული იქნება ჩემს სხეულზე თუ რამდენად მოვახერხებ ფორმაში შესვლას. ორკვირიანი პაუზის შემდეგ, ნაკრებთან ერთად გუშინ ისევ ვივარჯიშე, რამაც კარგად ჩაიარა, დღეს მეორე ვარჯიში გვქონდა, მატჩამდე დარჩენილია ერთი ვარჯიში, რა თქმა უნდა, ჩემი სურვილია პირველი შეხვედრაში ვითამაშო, თუმცა რამდენად მოვახერხებ, ეს ალბათ უფრო ხვალ გვეცოდინება, მე არ მინდა ხელისშემშლელი ფაქტორი ვიყო, მინდა შესაბამის ფორმაში ვიყო და გუნდს დავეხმარო. ყველაფერს ვაკეთებ, იმაზე მეტსაც კი რაც შესაძლებელია, რათა ჩვენ ნაკრებთან ვიყო პირველივე მატჩზე და იმედი მაქვს, შევძლებ, პირველზე თუ ვერა მეორეზე მაინც, - თორნიკე შენგელია. "
შეგახსენებთ, თორნიკე შენგელიას გულის არითმიის გამო 9 აგვისტოს მოუწია ნაკრების დატოვება და ბარსელონაში გაემგზავრა, სადაც თავის გუნდის წარმომადგენლების მეთვალყურეობით, გამოკვლევები ჩაუტარდა და შესაძლებლობა მიეცა ნაკრებს დაბრუნებოდა.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში გაიმართება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით შეიკრიბება და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრები კვიპროსში, მასპინძელ ნაკრებთან, იტალიასთან, ბოსნია და ჰერცეგოვინასთან, ესპანეთთან და საბერძნეთთან ერთად იასპარეზებს. ჩვენი გუნდი პირველ მატჩს 28 აგვისტოს, 16:00 საათზე, ესპანეთთან გამართავს.
