"ჭიაბრიშვილი თვითონაც ვერ ჩამოყალიბდა მწვრთნელია, თუ ექსპერტი. ისეთ რაღაცებს საუბრობს, დიდი ბოდიში, მაგრამ სისულელე მგონია, რასაც ამბობს”
“გვეუბნება, რომ ჩემპიონატის დონე ძალიან დაბალია. კი, ბატონო. დიდი ხანია, ვამბობთ, რომ ასეა, მაგრამ ჩემპიონატის დონე ვინ უნდა აამაღლოს? მე უნდა ვიზრუნო ამაზე?!” - ეს განცხადება ლევან კობიაშვილმა ერთ-ერთ პოდკასტში გააკეთა.
დინამო ბათუმის მთავარი მწვრთნელი გიორგი ჭიაბრიშვილი ფეხბურთის ფედერაციის პრეზიდენტის, ლევან კობიაშვილის მისდამი კრიტიკას გამოეხმაურა.
"მინდა, გამოვეხმაურო საქართველოს ფეხბურთის ფედერაციის პრეზიდენტის სპორტულ გადაცემაში წარმოთქმულ სიტყვებს ჩემთან დაკავშირებით.
პირველ რიგში, ავღნიშნავ და იმედს ვიტოვებ, რომ ქართულ ფეხბურთში ჩართულ თითოეულ ადამიანს, იქნება ეს საფეხბურთო კლუბისა თუ ფედერაციის პრეზიდენტი, მენეჯერი, მწვრთნელი თუ ფეხბურთელი, გვაქვს ერთი სურვილი, მიზანი და პასუხისმგებლობა, რომ ქართული ფეხბურთი ხვალ იყოს იმაზე უკეთესი, ვიდრე არის დღეს. ქართული ფეხბურთის წარმატებასა და წარუმატებლობაზე პასუხისმგებლობასაც ვინაწილებთ ჩვენი როლების შესაბამისად. მე, ჩემს წილ პასუხისმგებლობას არასდროს გავქცეულვარ.
ფეხბურთის ფედერაციის პრეზიდენტის მიერ, ჩემი განცხადებისა და პიროვნების შეფასება იყო მინიმუმ არაკორექტული, უფრო სიღრმისეული შეფასებისგან თავს შევიკავებ.
აქედან გამომდინარე, მინდა, რომ ეს ,,გაუგებრობა'' ჩემი ამ განცხადებით დამთავრდეს და ყველა დავუბრუნდეთ იმ საქმის კეთებას, რასაც ქართული ფეხბურთის უკეთესი ხვალინდელი დღის შენება ჰქვია.
ჟურნალისტების ამ თემით ინტერესი ლოგიკური და გასაგებია. მადლობა მათ ქართული ფეხბურთის გაშუქებისთვის, მაგრამ მინდა, რომ პატივი სცეთ ჩემს გადაწყვეტილებას. ამ საკითხზე ჩემი კომუნიკაცია აღნიშნული განცხადებით ამოიწუროს.
წარმატებებს ვუსურვებ ყველას ქართული ფეხბურთის საკეთილდღეოდ!", - წერს ჭიაბრიშვილი სოციალურ ქსელში.
