18-წლიანი პაუზის შემდეგ, ანხელ დი მარია მშობლიურ როსარიო სენტრალში დაბრუნდა. აღსანიშნავია, რომ ვეტერანი გარემარბი სახლში დაბრუნებას ფიქრობდა ჯერ კიდევ ერთი წლის წინ, მაგრამ არგენტინელი ვინგერი აღმოჩნდა რამდენიმე უსიამოვნო ინციდენტის ეპიცენტრში.
საქმე ისაა, რომ მას შემდეგ, რაც გაჩნდა ცნობები მადრიდის რეალის ყოფილი გარემარბის "რკინიგზელებში" დაბრუნების შესახებ, მის ოჯახის წევრებს მოკვლით ადგილობრივი კრიმინალური დაჯგუფება დაემუქრა. ამის გარდა, არგენტინის ეროვნული გუნდის მე-11 ნომრის ქალაქში ვანდალებმა მისი ფრესკაც დააზიანეს.
რა იყო ამ ყველაფრის მიზეზი? ადგილობრივი ნარკოკარტელების ერთ-ერთი დამკვიდრებული მეთოდია ცნობადი სახეების დაშანტაჟება და მათგან ფულის გამოძალვა. კრიმინალებს იმედი ჰქონდათ, რომ "ელ ფიდეო" გამოეხმაურებოდა მათ შეტყობინებას და უსაფრთხოების მოპოვების გარანტიის მიზნით მათ მსხვილ თანხას გადაუხდიდა.
როსარიო, არგენტინის ერთ-ერთი ყველაზე დიდი ქალაქი, უკანასკნელი წლების განმავლობაში ნარკოდანაშაულისა და ბანდიტური დაპირისპირებების ეპიცენტრად იქცა. ქალაქში მოქმედებენ ორგანიზებული კრიმინალური ჯგუფები, როგორიცაა Los Monos, რომლებსაც სჭირდებათ ყურადღება, ფული ან გავლენა - ამისთვის კი ცნობილ პირებს (როგორიცაა ფეხბურთელები ან მათი ოჯახები) ხშირად იღებენ მიზანში.
ცნობისთვის, როსარიოდან მუქარის წერილებს წარსულში ლიონელ მესიც იღებდა. რა მდგომარეობაა ახლა? პოლიციამ დააკავა ამ საქმის მთავარი ეჭვმიტანილი და 37 წლის ვინგერს როსარიოში უსაფრთხოდ ცხოვრების გარანტიაც მისცა. ამ ყველაფრის შემდეგ, ვეტერანი შემტევი ცენტრალში დაბრუნდა.
