ქართული კლუბებისთვის ყველაზე საინტერესო ეტაპი - ევროტურნირები იწყება. სამწუხაროდ, უკვე დიდი ხანია, ეს პერიოდი ქართველი გულშემატკივრებისთვის ცუდად დასამახსოვრებელია, რადგან ჩვენი კლუბები ყოველ ჯერზე წარუმატებლად გამოდიან.
ახალი ციკლი, ახალი იმედები - წელს საქართველოს სახელს ჩემპიონთა ლიგასა და კონფერენს ლიგაზე 4 გუნდი წარადგენს - იბერია, ტორპედო, დილა და სპაერი.
იბერია 1999
როგორც წესი, ჩემპიონის გზა ევროტურნირებზე გაცილებით მარტივია, რადგან ჩემპიონთა ლიგიდან გამოვარდის შემთხვევაში, გუნდი კონფერენს ლიგაზე გადადის, თუ ჩემპიონთა ლიგის საკვალიფიკაციოზე ერთი ეტაპი გაიარა, ეს უფრო დიდი ფუფუნებაა, რადგან კონფერენს ლიგის ფლეი-ოფი გარანტირებული აქვს. იბერია ამ ევროტურნირებს სრულ მზადყოფნაში ხვდება. გუნდმა რამდენიმე ტრანსფერი განახორციელა და ლეგიონერები დაიმატა. განსაკუთრებით კარგი შთაბეჭდილება აფრიკელმა არმელ ზოჰურიმ დატოვა, რომელიც სუპერთასზე ტორპედოსთან მატჩში შეცვლაზე შევიდა და თავის გუნდში საუკეთესო იყო. იბერია მოქმედი ჩემპიონია, ამ სტატუსს წელსაც ამართლებს და ეროვნული ლიგის ლიდერია. ამაში დიდი წვლილი მიუძღვის ლევან კორღალიძეს, რომელიც ტაქტიკურად მაღალი დონის სპეციალსიტია და მალმიოსთანაც აქვს შემუშავებული გეგმა, რომლის მიხედვითაც შვედური გრანდის დამარცხებას შეეცდება. მიმდინარე სეზონში იბერიას საუკეთესო ფეხბურთელი იური ტაბატაძეა. მის ანგარიშზე 9 გოლი და 3 საგოლე გადაცემაა. იბერიას სათამაშო სტილი ევროპული გუნდებისთვის მართლაც სახიფათოა. შეტევის ხაზში გუნდს სწრაფი შემტევები ჰყავს, რომლებიც მცველებს ზურგს უკან გარბიან და ბევრ მომენტს ქმნიან.
ტორპედო
ევროტურნირებამდე რამდენიმე დღით ადრე, ტრანსფერები ტორპედომაც განახორციელა. ყველაზე ხმაურიანი ტრანსფერი ვლადიმერ მამუჩაშვილის გამოსყიდვაა, რომელიც იმერლებმა მერაბ გიგაურის შემცვლელად დაიმატეს. სეზონის მძიმე სტარტის შემდეგ, ტორპედომ ეროვნული ლიგის მეორე წრე მაღალ დონეზე ჩაატარა და ლიდერთა შორის გაერია, თუმცა იმ ფეხბურთელებით და რესურსით, რაც ამ კლუბს აქვს, ეს საკმარისი არ არის და მიზნები უფრო მაღალია. ტორპედო კონფერენს ლიგაზე ყაზახურ ორდაბასს უპირისპირდება და პირველი საშინაო გამარჯვების მოპოვება მათთვის უმნიშვნელოვანესია. ტორპედოს მთავარმა გოლეადორმა ბიორნ იონსენმა სეზონი უგოლოდ დაიწყო, მაგრამ ბოლო მატჩებში ფორმაში შევიდა და მის ანგარიზე უკვე 7 გოლია. საოცარ ფორმაშია ეროვნული ნაკრების ფეხბურთელი საბა კვერკველია. იბერიას მსგავსად, ტორპედოსაც სწრაფი და რეაქტიული შემტევები ჰყავს - კოხრეიძე ღუდუშაური, პირესი.
დილა
ამ ევროტურნირებს ყველაზე კარგ განწყობაზე გორის დილა ხვდება. რამდენიმე დღის წინ, მათ საქართველოს სუპერთასი მოიგეს და მზად არიან, თავიანთი სიტყვა ევროტურნირებზეც თქვან. დილას ბოლო წლების პოლიტიკის გათვალისწინებით, გასაკვირი არაა, რომ ამჟამინდელ გუნდში ადგილობრივზე მეტი ლეგიონერია. როგორც წესი, დილას ყოველთვის გამორჩეული ლეგიონერები ჰყავს და ფონს ასე გადიან. ევროტურნირების წინ, გორელებმა გამოცდილი მცველი გრიგოლ ჩაბრაძე დაიმატეს, რომელმაც უკვე სადებიუტო გოლის გატანაც მოასწრო. კარგ ფორმაშია ამ გუნდის ფორვარდი შოთა შეყილაძე, რომლის ანგარიშზე 8 გოლი და 2 ასისტია. ლუქსემბურგის რასინგის სახით დილას არც თუ ისე ძლიერი მეტოქე შეხვდა და რეალური შანსი აქვთ, რომ პირველი ეტაპი წარმატებით დაძლიონ.
სპაერი
საქართველოს მაშტაბით სპაერი ყოველ ჯერზე გვაოცაებს და ახლა ევროტურნირების დროა. სპაერი საქართველოს თასის გამარჯვებული გახდა, ეროვნული ლიგა 2-ში ასპარეზობს და კონფერენს ლიგაზე ითამაშებს. ამ გუნდს არ ჰყავს გამოკვეთილი ლიდერი. მათი წარმატების მთავარი საიდუმლო გუნდურობა და წლები ერთად თამაშია. გასაკვირი არაა, რომ სპაერი ლიგა 2-ში პირველ ადგილს იკავებს და ახლოსაა ისტორიაში პირველად ეროვნულ ლიგაში აღზევებასთან. აღსანიშნავია, რომ ეს გუნდი კონფერენს ლიგაზე გამოსვლას მეორე ეტაპიდან იწყებს და მათი მეტოქე უძლიერესი ვენის ავსტრიაა. ცოტა ხნის წინ, სპაერმა საქართველოს სუპერთასზე ითამაშა, სადაც ფინალში გავიდა. მეტოქე იმდენად ძლიერია, რომ შანსები დიდი არ არის, თუმცა სპაერი თავიანთი პლიუსების გამოყენებას და ქართველი გულშემატკივრის კიდევ ერთხელ გაოცებას შეეცდება.
