დღეს საქართველოს კალათბურთელთა ნაკრები ევრობასკეტის ჯგუფური ეტაპის მეოთხე შეხვედრაში ტურნირის ერთ-ერთ მასპინძელ კვიპროსს დაუპირისპირდება.
საქართველოს ნაკრები
ევრობასკეტის C ჯგუფში ასპარეზობა ჩვენმა გუნდმა ევროპის მოქმედ ჩემპიონ ესპანეთთან სენსაციური გამარჯვებით დაიწო (83:69), მეორე მატჩი იტალიასთან წააგო (78:62), მესამე შეხვედრაში საბერძნეთთან დიდი სხვაობით, 53:94 დამარცხდა.
იტალიასთან და საბერძნეთთან საქართველოს ნაკრებს მიყოლებით მოუწია თამაში. იტალიელებთან მატჩის შემდეგ, მორიგი შეხვედრა 22 საათში დაიწყო, შესაბამისად, სამწვრთნელო შტაბმა ძალების გადანაწილებისა და ტრავმების აცილების მიზნით, მიიღო გადაწყვეტილება, რომ ახალგაზრდა კალათბურთელებს მეტი დრო ჰქონოდათ საბერძნეთთან. გოგა ბითაძეს არ უთამაშია, თორნიკე შენგელიამ კი მოედანზე ოთხ წუთამდე გაატარა.
ფინალის ტოლფასი მატჩები უწოდა მორიგ შეხვედრებს საქართველოს ნაკრების კალათბურთელმა, დუდა სანაძემ:
“არ გვაინტერესებს კვიპროსთან ფავორიტი ვინაა, ამას მნიშვნელობა არ აქვს, ჩვენ გველის, ჩათვალეთ, ფინალის ტოლფასი მატჩი, მომდევნო 2 თამაშში გადაწყდება ჯგუფიდან გასვლის ბედი, ამიტომ ჩვენთვის ახლა მთავარია მიზნამდე მივიდეთ.”
საქართველოს ნაკრები ამ დროისთვი 1 მოგებით ჯგუფში მე-5 ადგილზეა, 1 მოგება აქვს ბოსნია და ჰერცეგოვინას, თუმცა ქულათა შეფარდებით, მეოთხე პოზიციას იკავებს. ჯგუფის ლიდერი საბარძნეთია 3-დან 3 მოგებით. ჯგუფიდან 4 საუკეთესო გადის.
საქართველოს ნაკრების ოფიციალური შემადგენლობა ევროპის ჩემპიონატზე:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი.
კვიპროსის ნაკრები
კვიპროსის ნაკრებმა მიმდინარე ევრობასკეტზე აქამდე ჩატარებული სამივე მატჩი წააგო. პირველი შეხვედრა ბოსნია და ჰერცეგოვინასთან 91:64 წაგო, შემდეგ საბერძნეთთან 69:96 და ესპანეთთან 91:47.
კვიპროსის ნაკრები ტურნირის ერთ-ერთი ყველაზე სუსტი გუდია და როგორც მოსალოდნელი იყო ჯგუფის აუტსაიდერია.
კვიპროსელები ევრობასკეტზე მასპინძლის სტატუსის გამო მოხვდნენ, სხვა შემთხვევაში საკვალიფიკაციო ეტაპის დაძლევას ვერ შეძლებდნენ.
ევრობასკეტის მზადების ფარგლეში კვიპროსელებმა ორი მატჩი გამართეს და ორივე წააგეს, სერბეთთან 55:122 და ისრაელთან 69:109.
კვიპროსის ნაკრების შემადგენლობა ევრობასკეტზე
სტეფანოს ილიადისი (“ანორთოსისი”), ხრისტოს ლოიზიდესი (“აეკ”), ანტრეას ხრისტოდულუ (“ლიმასოლი”), იოანის პაშიალისი (“კერავნოსი”), ფილიპოს ტიგკასი (“კერავნოსი”), იოანის იანარასი (“აეკი”), კონსტანტინოს სიმიცისი (“აეკი”), აენეას იუნგი (“აპოელი”), მიხალის კუმისი (“კერავნოსი”), სიმონ მიხაილი (“კერავნოსი”), ნიკოს სტილიანუ (“კერავნოსი”); დარალ უილისი (“ტაიშინი”)
შეგახსენებთ, საქართველოს ნაკრები ჩვენი ქვეყნის ისტორიაში ზედიზედ, მეექვსე ევრობასკეტზე ასპარეზობს. 2022 წელს აღნიშნულ ტურნირზე ჩვენმა გუნდმა ჯგუფიდან გასვლა ვერ შეძლო.
რაც შეეხება FIBA-ს მსოფლიო რეიტინგს, ამ დროისთვის, კვიპროსი 84-ე ადგილზეა, საქართველო 24-ე პოზიციას იკავებს, ევროპაში კვიპროსი ოცდამეთვრამეტეა, საქართველო მე-14.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით ასპარეზობს და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველო – კვიპროსის მატჩი დღეს, თბილისის დროით, 19:15 საათზე დაიწყება, მანამდე კი C ჯგუფის შეხვედრა საბერძნეთსა და ბოსნია და ჰერცეგოვინას შორის გაიმართება.
