ძიუდოს საერთაშორისო ფედერაციამ მსოფლიოს რეიტინგი განაახლა. საქართველოსთვის ისტორიული შედეგის ავტორი ეთერ ლიპარტელიანი -57 კგ. წონითი კატეგორიის ლიდერია, რაც ჩვენი ქვეყნისთვის კვლავ ისტორიული შედეგია, რადგან ქალთა შორის საქართველოდან რეიტინგში პირველ ადგილზე არასდროს არავინ ყოფილა. ლიპარტელიანს 6321 ქულა აქვს და ეთო საქართველოს ნაკრებიდან, ამ დროისთვის ერთადერთია, ვინც რეიტინგის ლიდერია.
შეგახსენებთ, 25 წლის ეთერ ლიპარტელიანმა 15 ივნისს მსოფლიოს ჩემპიონობა იზეიმა და გახდა პირველი ქართველი ქალი ძიუდოისტი, რომელმაც მსოფლიოს ჩემპიონატზე ოქროს მედალი მოიპოვა. ეთომ უნგრეთში გამართულ პირველობაზე საქართველოს ნაკრებთან ერთად საერთო გუნდურ ჩათვლაშიც ჩემპიონობა იზეიმა. აღსანიშნავია, რომ ლიპარტელიანმა ჯამურად 9 შეხვედრა ჩაატარა, ყველა მოიგო, 8 დაპირისპირებაში კი იპონით გაიმარჯვა.
რაც შეეხება კაცთა რეიტინგს, ამ დროისთვის ქართველთაგან პირველ ადგილზე არავინაა, კაცთა შორის საქართველოს ნაკრებიდან რეიტინგში სუაკთეესო შედეგი ლაშა ბექაურს აქვს, რომელიც მე-2 ადგილზეა (-90 კგ.). მე-3 ადგილს იკავებენ, ტატო გრიგალაშვილი (-81 კგ.) და გურამ თუშიშვილი (+100 კგ.).
ფოტო: ძიუდოს საერთაშორისო ფედერაცია
