სულ რამდენიმე წუთის წინ თბილისი არენაზე 2027 წლის მსოფლიო ჩემპიონატის საკვალიფიკაციო ეტაპის პირველი მატჩი დასრულდა, სადაც მაყურებელმა საქართველო-უკრაინის საკალათბურთო დაპირისპირება იხილა.
იმის მიუხედავად, რომ ჩვენი ნაკრები ამ შეხვედრას ფავორიტის სტატუსით შეხვდა, ალექსანდარ ჯიკიჩის გუნდს სტუმრებმა საკმაოდ დიდი წინააღმდეგობა გაუწიეს და თამამად შეგვიძლია იმის თქმა, რომ სრულიად დამსახურებულადაც გაიმარჯვეს. მატჩი საბოლოო ჯამში 79-92 დასრულდა.
პარკეტზე საუკეთესო ალექსანდრ კოვლიარი იყო, რომელმაც უკრაინის ნაკრებს ულიდერა. 23 წლის კალათბურთელის ანგარიშზე 31 ქულა, 6 მოხსნა და 6 პასი იყო. ჩვენი ნაკრებიდან ყველაზე კარგი სტატისტიკა დუდა სანაძემ შემოგვთავაზა: 22 ქულა, 5 მოხსნა.
საქართველოს საკალათბურთო ნაკრები მომდევნო მატჩს გასვლაზე, ესპანეთის ნაკრების წინააღმდეგ ჩაატარებს. მატჩი 30 ნოემბერს, თბილისის დროით 22:45 საათზე გაიმართება.
