ზუსტად 10 წლის წინ, ლესტერ სიტიმ პრემიერ ლიგის ჩემპიონობის სახით ფეხბურთის ისტორიაში ერთ-ერთი ყველაზე ხმაურიანი სენსაცია შემოგვთავაზა. დღეს, "მელიები" არიან გუნდი, რომელიც მომდევნო სეზონიდან ინგლისის რანგით მე-3 დივიზიონში ითამაშებს. მე-2 ლიგის სეზონი ჯერ არ დასრულებულა, მაგრამ მიდლანდელებმა დარჩენის თეორიული შანსიც დაკარგეს.
იმედი დავიტოვოთ, რომ კინგ ფაუერ სთეიდიუმის ბინადრები შეძლებენ დაბრუნებას, იქამდე კი გავიხსენოთ მათი ჩემპიონობა, რისი მთავარი შემოქმედიც კლაუდიო რანიერი იყო. სირთულეებითა და სკეპტიციზმით სავსე გზა, რომელიც 2015/16-ის სეზონის ბოლოს ლამაზ ზღაპრად დაგვირგვინდა.
იტალიელ მწვრთნელამდე, ვიშაი შრივადანაპრაბხას კლუბში მუშაობდა ნაიჯელ პირსონი - თავკაცი, ვინც ეს გუნდი ამოიყვანა ჩემპიონშიპიდან და შემდეგ, უმაღლეს დივიზიონში ადგილიც შეუნარჩუნა. ინგლისელი დამრიგებლის ლესტერული კარიერა აზიაში დატრიალებულ სკანდალს შეეწირა.
"მელიები" ტაილანდში ჩავიდნენ გულშემატკივრების უკეთ გაცნობის მიზნით, მათი გუნდის მწვრთნელმა, მისმა შვილმა და კიდევ ორმა მოთამაშემ კი თავისუფალ დროს აზიელ ქალბატონებთან ერთად სექსუალური ხასიათის ვიდეო ჩაწერეს. ამ ინციდენტის შემდეგ, მიდლანდში მათი კარიერა დასრულდა.
62 წლის მწვრთნელის შემცვლელად მოვიდა ტურინის იუვენტუსის ყოფილი დამრიგებელი და უნდა ითქვას, რომ ინგლისური პრესა მის დაბრუნებას კრიტიკით შეხვდა. მაგალითად, გარი ლინეკერმა "ტინკერმენის" კინგ ფაუერზე დანიშნვას ბანალური და კბილებს შორის გაჭედილი ვარიანტი უწოდა.
The Guardian-მა ხაზი გაუსვა იმ ფაქტს, რომ 2004 წლიდან, ლონდონის ჩელსიდან გაშვების შემდეგ, რანიერი ორ სეზონზე დიდხანს არსად გაჩერებულა. ჰარი რედნაპმა აღნიშნა, შრივადანაპრაბხას კლუბში დანიშნვით, იტალიელ სპეციალისტს კარიერის მიწურულს ძალიან გაუმართლა.
რანიერი გააკრიტიკა მარკ ბოსნიჩმაც კი, რომელიც 2000-იანების დასაწყისში კოკაინის მოხმარების გამო ფეხბურთიდან მოკვეთეს. ვეტერანმა სპეციალისტმა მათ ყველას შეუთვალა ლაკონური პასუხი: "კონცენტრირებული ვარ საქმეზე და არა სხვის აზრებზე". რა მოხდა შემდეგ? ლესტერის დამრიგებელმა მთელი საფეხბურთო სამყარო დაადუმა.
"მელიები" იმავე სეზონში გახდნენ პრემიერ ლიგის ჩემპიონები, გზად კი აჯობეს არსენ ვენგერის არსენალს, ლუი ვან გაალის მანჩესტერ იუნაიტედს, ჟოზე მოურინიოს ჩელსის, მანუელ პელეგრინის მანჩესტერ სიტის, იურგენ კლოპის ლივერპულსა და მაურისიო პოჩეტინოს ტოტენჰემს.
