მადრიდის ატლეტიკოს ყოფილმა კაპიტანმა, დიეგო გოდინმა ლიონელ მესისა და კრიშტიანუ რონალდუს შორის გააკეთა არჩევანი, თუ ვინ იყო მათ შორის უფრო რთული მეტოქე. შეგახსენებთ, ურუგვაელმა ყოფილმა უკანახაზელმა თავისი კარიერის მანძილზე არგენტინელი და პორტუგალიელი შემტევების წინააღმდეგ ათეულობით შეხვედრა ჩაატარა.
"მესი რონალდუზე რთული მოწინააღმდეგეა და ამას რამდენიმე მიზეზი აქვს. არ არსებობს სიტუაცია, რომლიდანაც ის გამოსავალს ვერ გამონახავს. იყო დრო, როცა ლეოზე პირდაპირი მნიშვნელობით ვნადირობდით, ის იღებდა ფეხში დარტყმებს, მაგრამ არ ვარდებოდა, აგრძელებდა ბურთით სვლას.
კრიშტიანუ სხვა სტილის ფეხბურთელია. ინტენსიური მეურვეობითა და საჯარიმოში სივრცეების ჩაკეტვით მისი შეჩერება შესაძლებელია. ორივე მათგანი კი, როგორც არგენტინელი შემტევი, ისე პორტუგალიელიც, არიან მოთამაშეები, რომლებმაც ატლეტიკოს არაერთი ტიტული წაართვეს."
