ნაპოლიში ახალი სეზონისთვის მზადება უკვე დაიწყეს. გუნდს რამდენიმე ფეხბურთელი დატოვებს, რაც იმას ნიშნავს, რომ "პარტენოპეის" წინ საკმაოდ დატვირთული ზაფხულის სატრანსფერო ფანჯარა ელოდება. თუმცა, ამ სტატიაში კლუბის პოტენციურ სამიზნეებზე არ ვისაუბრებთ, არამედ ყურადღებას გავამახვილებთ ანტონიო კონტეზე, რომელიც შესაძლოა მომდევნო სეზონში ნაპოლის მთავარი მწვრთნელი აღარ იყოს.
იმის მიუხედავად, რომ ამ მომენტისთვის ნაპოლი სერია ა-ს ლიდერია, იტალიელი მწვრთნელის კლუბიდან წასვლის შანსი მაინც საკმაოდ დიდია. ეს დიდწილად აურელიო დე ლაურენტისთან კონფლიქტური სიტუაციის გამოა შესაძლებელი. იტალიური მედია უკვე რამდენიმე თვეა, რაც მხარეებს შორის კონფლიქტზე საუბრობს და სიტუაცია არც სეზონის მიწურულს შეცვლილა. ნაპოლის ჩემპიონობის შემთხვევაში, ანტონიო კონტემ "პარტენოპეი" შეიძლება მაინც დატოვოს.
ვინ შეცვლის ანტონიო კონტეს ნაპოლიში? როგორც ირკვევა, კლუბში ამაზე უკვე ფიქრობენ და ცნობილია #1 სამიზნეც — მასიმილიანო ალეგრი! დიახ, ნეაპოლურ გუნდში გამოცდილი იტალიელი მწვრთნელი ძალიან მოსწონთ და თუ ადგილობრივ პრესას დავუჯერებთ, აურელიო დე ლაურენტისი ყველაფერს გააკეთებს 57 წლის სპეციალისტის დასაყოლიელებლად.
მაქს ალეგრი საქმეში დასაბრუნებლად ემზადება, მეტიც, იტალიელს ნაპოლის გარდა მილანს, იუვენტუსსა და რომასაც კი უკავშირებენ. შეგახსენებთ, ალეგრის ბოლო კლუბი იუვენტუსი იყო, საიდანაც 2024 წელს წამოვიდა.
უახლოეს ერთ თვეში, როგორც ანტონიო კონტეს, ისე მაქს ალეგრის თაობაზეც უფრო მეტი ინფორმაცია გახდება ცნობილი.
