რამ გამოიწვია "პარტენოპეის" ჩავარდნა და როგორ უნდა დააღწიოს გუნდმა თავი ამ ჭაობს? მივყვეთ ყველაფერს თანმიმდევრობით, დავიწყოთ თავიდან და გასული სეზონი გავიხსენოთ. პირველი წრეც არ იყო დამთავრებული, მაგრამ უკვე ნათლად ჩანდა, რომ "აძური" სტაბილურობით, გუნდურობითა და თამაშის ხარისხით კონკურენტებზე ერთი თავით მაღლა იდგა.
მაშინ, როდესაც სერია ა-ს სხვა ლიდერები ქულებს კარგავდნენ, ყველაზე უწყინარ სიტუაციაშიც, "ლურჯები" გამარჯვებებს ისე აცხობდნენ, როგორც ნეაპოლიტანურ პიცას. სეზონის მიწურულს, კონკურენტების მხრიდან ნელ-ნელა შეინიშნებოდა სტაბილურობის აღდგენა, მაგრამ უკვე გვიანი იყო, მარადონას სახელობის არენის ბინადრები მიუწვდომლები იყვნენ.
ლუჩანო სპალეტის შეგირდებს მოედანზე პრაქტიკულად ყველაფერი გამოსდიოდათ, ზღაპრულ სეზონს ატარებდნენ. როგორი სამწუხარო, თუმცა კანონზომიერიც არ უნდა იყოს, ყველა ზღაპარს აქვს თავისი ლოგიკური დასასრული და გამონაკლისი არც ნაპოლი აღმოჩნდა. ისმის ითხვა: რატომ დასრულდა ეს ზღაპარი სულ რაღაც ერთ წელიწადში?
გამიზნულად თუ უნებლიედ, "პარტენოპეის" ტკბილი ამბავი ამ ისტორიის მთავარმა შემოქმედმა დაასრულა, ვგულისხმობთ აურელიო დე ლაურენტისს, რომელმაც თავისი შეცდომებით გუნდი ტოპკლუბის წოდებას ჩამოაშორა. იტალიელმა ფუნქციონერმა სპეციალისტიც კი ვერ შეარჩია ადეკვატურად, თანაც სეზონის განმავლობაში არაერთხელ.
შევეშვათ იმ ფაქტს, რომ სპალეტის წასვლა გარდაუვალი იყო, შეუცვლელი არავინაა, თუმცა გააჩნია, თუ ვინ უნდა იყოს შემცვლელი. "აძურის" პრეზიდენტმა სკუდეტოს გამარჯვების მომტანი სპეციალისტი ჩაანაცვლა თავკაცით, რომლის კარიერული წარმატებები, თანაც არც თუ ისე მაშტაბური, გასული დეკადის სტარტზე დარჩა.
ფრანგმა დამრიგებელმა სეზონის სტარტზევე განიცადა კრახი, დე ლაურენტისმა კი მას ეს მარცხი არ აპატია. ამის შემდეგ ბევრს ეგონა, რომ იტალიელი ფუნქციონერი ჭკუას ისწავლიდა და ამჯერად მოიწვევდა ვინმე თანამედროვე სპეციალისტს, მაგრამ არა, ისევ იგივე, "ლურჯების" თავკაცის როლი ამჯერად ძველმა ნაცნობმა მოირგო.
საუბარია მაძარის შესახებ, რომელსაც უკვე 10 წელიწადზე მეტია, რაც ღირებული არაფერი გაუკეთებია. დიახ, მარადონას სახელობის სტადიონის ბინადრები შეძლებისდაგვარად ხმაურობდნენ მთელი ევროპის გასაგონადაც, მაგრამ ეს ყველაფერი დიდი ხნის წინ იყო. ნაპოლის შემდეგ, იტალიელმა თავკაცმა გამოიცვალა 5 კლუბი და თითოეულში წარუმატებლობა იგემა.
სეზონის გადარჩენის გეგმა კი ძალიან ბანალურია - ჩემპიონთა ლიგის ზონაში შესვლა. "ლურჯები" ამჟამად 36 ქულით მეცხრე ადგილს იკავებენ და ოთხეულამდე 9 ქულა აშორებთ. რაც შეეხება ევროთასებზე გამოსვლას, გეგმა აქაც სტანდარტულია, რაც შეიძლება წინ გაჭრა. შეგახსენებთ, მარადონას სახელობის არენის ბინადრების მეტოქე ჩემპიონთა ლიგის 1/8 ფინალში ბარსელონა იქნება.
გავერკვიეთ იმაში, თუ რა მნიშვნელოვანი როლი ითამაშა მთავარი მწვრთნელის ფაქტორმა ნაპოლის რეგრესში. ახლა კი განვიხილოთ ფეხბურთელებისა და ტრანსფერების საკითხი. "პარტენოპეიმ" ხვიჩა კვარაცხელია და ვიქტორ ოსიმენი შეინარჩუნა, თუმცა სხვა მხრივ, გაძლიერებისთვის პრაქტიკულად არაფერი გაუკეთებია.
ჩავარდნილი საკადრო ცვლილებები მთავარი მწვრთნელის თანამდებობასა და გუნდის შემადგენლობაში - ეს შეცდომები სწორედ "ლურჯების" პრეზიდენტის კისერზეა. კიდევ ერთი ფაქტორი, რომელმაც დაჩრდილა მარადონას სახელობის არენის ბინადრების სიდიადე, კონკურენტების გაძლიერება არის. მაშინ, როდესაც გუნდში სისტემური ქაოსი იყო, კონკურენტები გულხელდაკრეფილები არ მსხდარან.
განსაკუთრებით ეს ითქმის მილანის ინტერზე, რომელმაც იდეალური სატრანსფერო კამპანია ჩაატარა. მიუხედავად იმისა, რომ რომელუ ლუკაკუ, ანდრე ონანა და მილან შკრინიარი წავიდნენ, გუნდი ახალ ვარსკვლავებს შეეგება: მარკუს ტურამს, იან ზომერსა და ბენჯი პავარს. შედარებისთვის გავიხსენოთ, თუ ვინ მოვიდა ლოზანოსა და კიმის ნაცვლად ნაპოლიში...
ყველა იაფად მოყვანილი უცნობი ტალანტი ვერ გაამართლებს, ალბათ ხვდებით, ვისაც ვგულისხმობთ. დღეისთვის ბოლო კითხვა - რა პერსპექტივა აქვთ კვარასა და ოსიმენს "აძურიში"? რთულია პასუხის გაცემა, სანამ აურელიო გონს არ მოეგება. ორივე მოთამაშე სატრანსფერო ბაზარზე ძვირად ფასობს, ორივეს არაერთი მსურველი ჰყავს.
ქართველი გარემარბის სახელს უკავშირებენ კატალონიურ გრანდს, ნიგერიელ თავდამსხმელს კი - პრემიერ ლიგის ბინადრებს. შესაძლოა, სწორედ მათი სარფიანად გაყიდვა გახდეს "ლურჯებისთვის" ერთგვარი გამოსავალი. ხვიჩასა და ვიქტორის სანაცვლოდ მიღებული ფულით დაკომპლექტეს ახალი კოლექტივი, თავად გუნდის ლიდერებმა კი მიიღონ ახალი გამოწვევები, მაგრამ ამჯერად უკვე სხვა კლუბებში.
ეს ყველაფერი ნაპოლის პრეზიდენტის გადაწყვეტილებებზეა დამოკიდებული. არსებობს მოსაზრება, რომ ოდიოზური პროდიუსერი მოდუნდა და ისტორიული მე-3 სკუდეტოთი მან თავისი მისია შეასრულა. დიახ, ჩემპიონობას ვერაფერი ამოშლის, მაგრამ ეს უკვე წარსულია, "პარტენოპეის" კი ახალი ემოციები სჭირდება.
