Golden Boy - ყოველწლიური ჯილდო, რომლითაც ევროპაში მოთამაშე ყველაზე ნიჭიერ ახალგაზრდა ფეხბურთელს ასახელებენ. ეს პრიზი სხვადასხვა დროს მოუგიათ ისეთ მოთამაშეებს, როგორებიც არიან ლიონელ მესი, უეინ რუნი, სერხიო აგუერო, კილიან მბაპე, ლამინ იამალი და სხვები.
Golden Boy-ს ჯილდოს მფლობელთა უმეტესობამ გაამართლა მოლოდინი, თუმცა არიან გამონაკლისებიც. ყველაზე დიდი ე.წ. "აცდენა" მოხდა 2015-2016 წლებში, როდესაც წლის საუკეთესო ახალგაზრდა მოთამაშედ დასახელდა ჯერ ანტონი მარსიალი, შემდეგ კი რენატო სანჩესი. ცხადია, იმ დროს ორივეს უდიდეს მომავალს უწინასწარმეტყველებდნენ.
რა მოცემულობა გვაქვს 2025 წლისთვის? ფრანგი თავდამსხმელი 29 წლის ასაკისთვის იწყებს თავის მეორე სეზონს ათენის აეკ-ში და ამიერიდან მის მეზობლად პორტუგალიელი შუახაზელიც იქნება. დიახ, 2016 წლის ყველაზე ნიჭიერი მოთამაშე იჯარით ათენის პანათინაიკოსში ითამაშებს.
საინტერესოა ისიც, რომ "სამყურების" ახალწვეული ნახევარმცველი დღემდე პარის სენ-ჟერმენის საკუთრებაში იმყოფება. მისი კონტრაქტი ფრანგულ კლუბთან 2027 წლამდეა გათვლილი. ერთი სიტყვით, ველოდებით გასული დეკადის შუა პერიოდის ყველაზე ნიჭიერ მოთამაშეთა დუელს ათენურ დერბიში.
