ტოტენჰემმა ენჯ პოსტეკოგლუ მთავარი მწვრთნელის თანამდებობიდან გაათავისუფლა. ეს ყველაფერი იმის გათვალისწინებით, რომ ავსტრალიელმა დამრიგებელმა ლონდონელებს ევროპა ლიგა მოაგებინა. ეს იყო ინგლისური კლუბის ზოგადად პირველი ტიტული 2008 წლის შემდეგ და პირველი ევროთასი 1984 წლიდან.
სპურსის ყოფილი მწვრთნელის შემთხვევამდე, ისტორიას ახსოვდა მხოლოდ ერთი ფაქტი, როდესაც კლუბმა თავისი დამრიგებელი ევროთასის მოგების შემდეგ გაუშვა. პირველმა ეს გააკეთა მილანის ინტერმა, როდესაც დაითხოვა ჯანპიერო მარინი 1994 წელს, უეფას თასის მოპოვების შემდეგ.
"ნერაძურის" გადაწყვეტილება შეგვიძლია გავამართლოთ იმით, რომ იტალიელი მწვრთნელი თავიდანვე იყო მისული დროებით, სეზონის გადარჩენის მიზნით. დიახ, კომოს ყოფილმა დამრიგებელმა შუა სეზონში შეცვალა ოსვალდო ბანიოლი, რომლის ხელში მეაცას ბინადრები არადამეჯერებლად ასპარეზობდნენ.
ჰოტსპურ სთეიდიუმის ბინადრებისა და პოსტეკოგლუს შემთხვევისგან განსხვავებით, მარინი ინტერის სრულფასოვანი მწვრთნელი არასდროს ყოფილა. აქედან გამომდინარე, ავსტრალიელი დამრიგებლის გაშვება თავის მხრივ უნიკალური მოვლენაა. ცხადია, არ ვგულისხმობთ ისეთ შემთხვევებს, როდესაც სპეციალისტი კლუბიდან თავისი ნებით მიდიოდა.
მაგალითისთვის შეგვიძლია გავიხსენოთ ზინედინ ზიდანის წასვლა მადრიდის რეალიდან 2018 წელს და ჟოზე მოურინიოს მიერ ისევ და ისევ მილანური კლუბის დატოვება 2010-ში. ორივე სპეციალისტმა მოიგო მთავარი საკლუბო ტურნირი, მაგრამ როგორც აღვნიშნეთ, ორივე თავისი ნებით წავიდა.
საინტერესოა ლონდონის ჩელსის შემთხვევაც რობერტო დი მატეოსა და რაფაელ ბენიტესის მიმართებაში. ორივე მწვრთნელმა "არისტოკრატები" ჩაიბარა შუა სეზონში და ორივე მათგანმა მათ ევროთასი მოაგებინა. იტალიელმა სპეციალისტმა შეცვალა ანდრე ვილაშ-ბოაში 2012 წლის მარტში, სეზონის ბოლოს კი მან მთავარი საკლუბო ტურნირი მოიგო.
ცხადია, სტემფორდ ბრიჯის ბინადრების იმდროინდელმა მწვრთნელმა შეინარჩუნა თანამდებობა, თუმცა ახალ სეზონში ის უკვე ნოემბერში გაუშვეს. დი მატეოს ნაცვლად მივიდა ესპანელი სპეციალისტი, რომელმაც ჩელსის ევროპა ლიგა მოაგებინა. ის წავიდა, რადგან მას მომავალი სეზონისთვის ნაპოლისთან წინასწარი შეთანხმება აკავშირებდა.
