მეორე ადგილის შენარჩუნება - ვერ შესრულდა
დიახ, ხელმძღვანელობის ულტიმატუმის გაჟღერების დროს, "ბებერი ქალბატონი" ჯერ კიდევ მეორე ადგილზე იყო. განვლილი ორი თვის განმავლობაში ბევრი რამ შეიცვალა და ახლა "ბიანკონერი" მე-4 პოზიციაზე იმყოფება. მე-2 ადგილი დაიკავა მილანმა, გასული ტურის შემდეგ კი იტალიის ყველაზე ტიტულოვან გუნდზე წინ ბოლონიაც აღმოჩნდა.
სერია ა-ში ჩატარებული 36 ტურის შემდეგ, ალიანც სთეიდიუმის ბინადრები 67 ქულით მეოთხე პოზიციაზე არიან და მეორეადგილოსანთან ჩამორჩენა შვიდ ქულას შეადგენს. როგორც ვხედავთ, ვიცეჩემპიონობის თეორიული შანსი დაკარგულია, რაც ნიშნავს იმას, რომ ალეგრიმ ულტიმატუმის პირველი პუნქტი ვერ შეასრულა.
გასულ სეზონთან შედარებით უფრო მეტი ქულის მოგროვება - ჯერჯერობით ვერ შესრულდა
როგორც გვახსოვს, შარშან იუვენტუსს ჩამოაკლეს 10 ქულა. ეს ფაქტი რომ არა, გუნდს 72 ქულა ექნებოდა. დაკლებული ქულების ჩათვლით კი ტურინელებმა შარშანდელი სეზონი 62 ქულით დაასრულეს. ახლა მათ ანგარიშზეა 67 ქულა, დარჩენილი ორი მატჩის მოგების შემთხვევაში, წლევანდელი სეზონი განვლილ სეზონზე შედეგიანი დაკლებული ქულების გათვალისწინებითაც იქნება.
იტალიის თასის მოგება - შესრულდა
დიახ, სამწლიანი პაუზის შემდეგ, "ბებერი ქალბატონი" სეზონს ტიტულის მოგებით ასრულებს. იტალიის თასის ფინალში მათ ბერგამოს ატალანტა დაამარცხეს. "ბიანკონერის" თავის ისტორიაში კოპა იტალია 15 ჯერ აქვს მოგებული, მაქსს კი - 5 ჯერ. მნიშვნელოვანია ისიც, რომ მასზე მეტჯერ აღნიშნული ჯილდო არავის აქვს მოგებული.
როგორც ვხედავთ, იუვენტუსის ხელმძღვანელობის ულტიმატუმი მხოლოდ ნაწილობრივ შესრულდა, ეს ფაქტი კი იტალიელი მწვრთნელის წასვლას კიდევ უფრო რეალურს ხდის. ტურინელთა ახალი დამრიგებელი, უდიდესი ალბათობით, ტიაგო მოტა იქნება, რომელთანაც ამჟამად მოლაპარაკებები აქტიურად მიმდინარეობს.
