ნაპოლის პრეზიდენტმა, აურელიო დე ლაურენტისმა თავისი კლუბის თავდამსხმელის, ვიქტორ ოსიმენის წასვლა არ გამორიცხა. იტალიელი პროდიუსერი და შეთავსებით კლუბის მმართველი ვარაუდობს, რომ მისი გუნდის ფორვარდი კარიერას მადრიდის რეალში, პრემიერ ლიგაში ან პსჟ-ში გააგრძელებს. მისი კომენტარი ასეთია:
"ოსიმენი რეალში, პრემიერ ლიგის რომელიმე გუნდში ან პარი სენ-ჟერმენში გადავა. ამის შესახებ ჯერ კიდევ გასული ზაფხულიდან მოყოლებული ვიცოდით. წინააღმდეგ შემთხვევაში, მისი მოქმედი ხელშეკრულების გახანგრძლივების პროცესი ასე არ გაიწელებოდა", - განაცხადა "პარტენოპეის" პრეზიდენტმა.
შეგახსენებთ, რომ თავისი ამჟამინდელი კლუბის დატოვებისა და პრემიერ ლიგაში გადასვლის სურვილი არც თავად ნიგერიელმა თავდამსხმელმა დამალა. თავის კუმირად მან დაასახელა დიდიე დროგბა, რითაც ლონდონის ჩელსიში შესაძლო ტრანსფერის შესახებ ჭორები კიდევ უფრო გაამძაფრა. "აძურის" ფორვარდის სახელს ეპლ-ის კიდევ არაერთ კლუბს უკავშირებენ.
ნიგერიის ეროვნული ნაკრების ცხრიანი დიეგო არმანდო მარადონას სახელობის სტადიონზე თამაშობს 2020 წლიდან და იმის შემდეგ, მან მოასწრო 119 მატჩის ჩატარება და 67 ბურთის გატანა. შეგახსენებთ, 25-წლის ფორვარდმა გასულ სეზონში ლუჩანო სპალეტის ხელმძღვანელობით მოიგო სკუდეტო, თავად შემტევი კი ჩემპიონატის საუკეთესო გოლეადორი გახდა.
