„საქართველოს ნაკრებმა მთელი ერი გაახარა და ეს სიხარული ყველას ეკუთვნის, მთელი საქართველო ბედნიერია და ჩვენმა ქვეყანამ ეს ყველაფერი დაიმსახურა. ევროპის ჩემპიონატზე ასპარეზობა ფეხბურთელებისთვის ძალიან დიდი წარმატება და კარიერული წინსვლის კარგი შესაძლებლობაა.
ეს გამარჯვება ამ დროისთვის როგორც სანაკრებო, ისე საკლუბო დონეზე, განუმეორებელი წარმატებაა.
საქართველო სპორტული, საფეხბურთო ქვეყანაა და ყოველთვის მჯეროდა, რომ ჩვენ ევროპის ჩემპიონატზე ასპარეზობას შევძლებდით.
რაც შეეხება გიორგი მამარდაშვილს, პენალტების სერია ლატარიაა და მეკარეს განსაკუთრებული ფსიქოლოგიური მომზადება სჭირდება. გიორგი მამარდაშვილი ძალიან პერსპექტიული ბიჭია და მომავალში კიდევ უფრო მაღალ დონეზე ითამაშებს. ჩვენ ქვეყანას ყოველთვის ჰყავდა ნიჭიერი მეკარეები და გიორგი აგრძელებს ამ ტრადიციას,“ - განაცხადა ოთარ გაბელიამ.
შეგახსენებთ, საქართველოს ეროვნულმა ნაკრებმა ევროპის ჩემპიონატის საკვალიფიკაციო ეტაპის პლეი-ოფის ფინალურ შეხვედრაში, საბერძნეთის ნაკრები პენალტების სერიაში 4:2 დაამარცხა და პირველად ჩვენი ქვეყნის ისტორიაში, საქართველო ევროპის ჩემპიონატზე ითამაშებს.
