2024 წლის პარიზის ოლიმპიური თამაშების მე-13 დღეს, საქართველოს ღირსებას ორი სპორტსმენი დაიცავს — ბერძნულ-რომაული სტილით მოჭიდავე ლაშა გობაძე და თავისუფალი სტილით მოჭიდავე ვლადიმერ გამყრელიძე.
ლაშა გობაძემ ოლიმპიადაზე ასპარეზობა გუშინ დაიწყო და 1/4 ფინალში გავიდა, სადაც მომავალ ფინალისტთან, ბულგარელ ნოვიკოვთან 3-8 დამარცხდა და ასპარეზობა რეპეშაჟში გააგრძელა, სადაც დანიის სახელით მოასპარეზე ტურპალ ბისულტანოვს შეხვდება. აღნიშნული ბარიერის წარმატებით დაძლევის შემთხვევაში, ქართველი მოჭიდავის მეტოქე ბრინჯაოს ფინალში უნგრელი დავიდ ლოსუნჩი იქნება.
დღეს, საქმეში თავისუფალი სტილით მოჭიდავეთა ნაკრებიც ერთვება და პირველი ხალიჩაზე ვლადიმერ გამყრელიძე გამოვა, რომელიც ოლიმპიადაზე 86 კგ წონით კატეგორიაში იასპარეზებს და საწყის ეტაპზე უზბეკ ჯავრაილ შაპიევს დაუპირისპირდება.
23 წლის ქართველი მოჭიდავე მსოფლიო ჩემპიონატის მოქმედი ვიცე-ჩემპიონია — 2023 წელს, ვლადიმერ გამყრელიძე ბელგრადში 79 კგ წონით კატეგორიაში ვერცხლის მედალს დაეუფლა. მის ანგარიშზე მსოფლიოს 23 წლამდელთა ჩემპიონატის ოქროს და ბრინჯაოს მედალიც არის.
თავისუფალი სტილით ჭიდაობის წინასწარი შეხვედრებით თბილისის დროით 13 საათსა და 30 წუთზე დაიწყება, ხოლო ლაშა გობაძე რეპეშაჟის 1/2 ფინალში 13 საათსა და 50 წუთზე იჭიდავებს.
პარიზი 2024, XIII დღე — გობაძის ბრინჯაოს შანსი და გამყრელიძის დებიუტი
