ფორმულა 1-ის 2025 წლის სეზონის რიგით მე-5 გრან პრის საუდის არაბეთმა, კერძოდ ჯიდას საქალაქო ტრასამ უმასპინძლა, სადაც დაძაბული და სანახაობრივი ბრძოლები ვიხილეთ.
საუდის არაბეთის გრან პრის კვალიფიკაციის გამარჯვებული მოქმედი ჩემპიონი, მაქს ვერსტაპენი გახდა, ხოლო რბოლაზე პირველობა არავის დაუთმო მაკლარენის ავსტრალიელმა პილოტმა, ოსკარ პიასტრიმ და კარიერაში მე-5 გამარჯვება მოიპოვა.
მაქს ვერსტაპენის საოცარი წრე კვალიფიკაციაზე
საუდის არაბეთში შაბათს ტრადიციულად კვალიფიკაცია ჩატარდა, სადაც უსწრაფესი წრე მაქს ვერსტაპენმა აჩვენა, კარიერაში 42-ე პოული მოუპოვა და აღნიშნული შედეგით ფორმულა 1-ის ისტორიაში მე-5 პოზიცია გაიმყარა.
დრამატული გამოდგა კვალიფიკაციის მესამე სეგმენტი, რომელიც ლანდო ნორისი ავარიით დაიწყო. ახალგაზრდა ბრიტანელმა პილოტმა ბოლიდი ვერ დაიმორჩილა, დამცავ ჯებირებს შეეჯახა და მხოლოდ მე-10 პოზიციას დასჯერდა.
კვალიფიკაციის მიწურულს კი ნამდვილი დრამა ვიხილეთ — საუკეთესო დრო ჯორჯ რასელმა დააფიქსირა, რომელიც რამდენიმე წამში ოსკარ პიასტრიმ მოხსნა და თითქოს პირველობა გაიფორმა, თუმცა, ვერსტაპენმა ფენომენალური წრე გაიარა და მას 0,010 წამით აჯობა.
მძიმე სტარტი და ვერსტაპენის 5 წამიანი ჯარიმა
ჯიდას საქალაქო ტრასაზე რბოლა კვირას, თბილისის დროით 21 საათზე დაიწყო და პირველივე მოსახვევში ინციდენტები ვიხილეთ. სტარტზე უკეთესი რეაქცია პიასტრი გამოავლინა, სპრინტში ვერსტაპენს აჯობა და მოსახვევშიც პირველი შევიდა. მოქმედმა ჩემპიონმა ტრასის ფარგლები დატოვა, წესების დარღვევით შეინარჩუნა ლიდერობა და 5 წამიანი ჯარიმა მიიღო, რამაც რბოლის ბედი გადაწყვიტა.
*საუდის არაბეთის გრან პრი, პირველი წრე
საკმაოდ მძიმე ავარია მოხდა პირველ მოსახვევში, სადაც რედ ბული და ალპინი შეეჯახნენ ერთმანეთს. პიერ გასლიმ და იუკი ცუნოდამ ერთმანეთს არაფერი დაუთმეს და ორივე მრბოლელი გამოეთიშა ასპარეზობას. აღნიშნული ავარიის გამო, უსაფრთხოების მანქანა გამოვიდა და რამდენიმე წრის განმავლობაში დარჩა ტრასაზე, რის შემდეგაც რბოლა ჩვეულ რიტმში განახლდა.
მაქს ვერსტაპენმა 5 წამიანი ჯარიმა პიტ სტოპზე მოიხადა, რითაც ოსკარ პიასტრიმ ისარგებლა და პელეტონს სათავეში ჩაუდგა. 24 წლის ავსტრალიელმა მრბოლელმა საუდის არაბეთში უშეცდომოდ იასპარეზა, 2025 წლის სეზონში უკვე მესამე გრან პრი მოიგო და სატურნირო ცხრილში გალიდერდა.
შარლ ლეკლერის დიდებული რბოლა და ფერარის პირველი პოდიუმი
კვალიფიკაციაზე ფერარი საკმაოდ სუსტად გამოიყურებოდა და საუკეთესო სამეულთან მიახლოებაც კი ვერ შეძლო, რის გამოც რბოლის დროს იტალიური გუნდისგან პოდიუმს არავინ ელოდებოდა. შარლ ლეკლერმა მე-4, ხოლო ლუის ჰამილტონმა მე-7 საუკეთესო დრო აჩვენა.
რბოლაზე კი ლეკლერმა საბურავების მენეჯმენტის მასტერკლასი შემოგვთავაზა — მონეგასკმა პილოტმა საშუალო ტიპის რეზინით ნახევარზე მეტი იარა და რამდენიმე წრის განმავლობაში გალიდერდა კიდეც. გვიანი პიტ სტოპის დახმარებით, შარლმა ჯერ ჯორჯ რასელზე მოიპოვა უპირატესობა, ხოლო შემდეგ ლანდო ნორისისგან თავი უშეცდომოდ დაიცვა და 2025 წელს ფერარი პოდიუმზე პირველად ავიდა.
*შარლ ლეკლერი, საუდის არაბეთი
ლანდო ნორისის დაბრუნება ჩაგდებული კვალიფიკაციის შემდეგ
ფორმულა 1-ის წლევანდელი სეზონის ერთ-ერთმა მთავარმა ფავორიტმა, ლანდო ნორისმა ჩაგდებული კვალიფიკაციის შემდეგ, რბოლაზე ლიდერებში დაბრუნება შეძლო, ბოლო წრეებზე პოდიუმისთვისაც კი იბრძოლა და საბოლოოდ მე-4 პოზიციაზე გავიდა.
25 წლის ბრიტანელმა მრბოლელმა სტარტი ხისტი ტიპის საბურავებით აიღო, რის გამოც პიტ სტოპზე გვიან, ლიდერის რანგში შევიდა. საშუალო ტიპის საბურავებით კი გრიდზე ყველაზე სწრაფი იყო, პოზიციების მოგება მოახერხა და 12 ქულის მოპოვება შეძლო.
ლანდო ნორისი საუდის არაბეთის გრან პრიზე პოდიუმთანაც კი იყო ახლოს — ბოლო წრეებზე მან ლეკლერთან ჩამორჩება აღმოფხვრა და 1,5 წამში მიუახლოვდა. ბრიტანელი პილოტი ბოლო წრეზე შეეცადა შეტევას, თუმცა, მონეგასკმა DRS-ის ზონაში არ შეუშვა და მესამე ადგილი შეინარჩუნა.
სატურნირო ცხრილი 5 რბოლის შემდეგ
ფორმულა 1-ის 2025 წლის სეზონს 5 რბოლის შემდეგ 99 ქულით ოსკარ პიასტრი უდგას, რომელიც ბრიტანელ თანაგუნდელს 10 ქულით უსწრებს. მესამე ადგილზე კი 87 ქულით მოქმედი მსოფლიო ჩემპიონი, მაქს ვესტაპენი იმყოფება.
კონსტრუქტორთა დავაში დიდი უპირატესობა აქვს მაკლარენს — ბრიტანულმა გუნდმა 5-დან 4 რბოლის მოგება შეძლო, 188 ქულა მოაგროვა და მეორეადგილოსან მერსედესს 77 ქულით გაუსწრო. რედ ბული 89 ქულით მე-3, ხოლო ფერარი 78 ქულით მე-4 პოზიციას იკავებს.
საუდის არაბეთის გრან პრის შემდეგ, ორკვირიანი დასვენება გამოცხადდება და სამეფო რბოლები ჩრდილოეთ ამერიკის კონტინენტზე, კერძოდ აშშ-ში დაბრუნდება — მაიამის გრან პრი 4 მაისს ჩატარდება.
