ჩეხეთის დედაქალაქ პრაღაში მიმდინარე ფიგურული ციგურაობის მსოფლიოს ჩემპიონატი ისტორიული აღმოჩნდა საქართველოსთვის.
დღეს ლუკა ბერულავასა და ანასტასია მეტელკინას სპორტულმა წყვილმა თავისუფალ პროგრამაში იასპარეზა, მსაჯებისგან 138,96 ქულა დაიმსახურეს, ორი პროგრამის ჯამში კი 218,41 ქულით მსოფლიოს ვიცე-ჩემპიონები გახდნენ, რაც ისტორიული შედეგია. საქართველოს აქამდე უფროსებს შორის მსოფლიოს ჩემპიონატზე მედალი არ ჰქონია.
სპორტულ წყვილებში ჩემპიონობა იზეიმა მინერვა ფაბიენ ჰაზეს და ნიკიტა ვოლიდინის წყვილმა გერმანიიდან (228.33), რომელმაც მილანი/კორტინას ზამთრის ოლიმპიურ თამაშებზე ბრინჯაოს მედალი დაიმსახურა.მსოფლიო ჩემპიონატის ბრინჯაოს პრიზიორი კი კანადიდან, ლია პერეირას და ტრენტ მიშოს წყვილი (216.09) გახდა.
შეგახსენებთ, ანასტასია მეტელკინასა და ლუკა ბერულავას სპორტულმა წყვილმა ზამთრის ოლიმპიურ თამაშებზე ვერცხლის მედალი დაისაკუთრა, რაც საქართველოსთვის ისტორიული შედეგია. ასევე, მეტელკინკასა და ბერულავას წყვილმა იანვარში ევროპის ჩემპიონობა იზეიმა.
