პირველად ქართული ავტოსპორტის ისტორიაში, საქართველოს NASCAR-ში გუნდი ეყოლება.
ქართული გუნდი - KOLKHI GRT ევრო NASCAR-ზე მიიღებს მონაწილეობას. KOLKHI GRT-ის ევროასპარეზზე დათა ქაჯაია და მარიამ დავითიძე წარადგენს. ქაჯაიამ NASCAR Euro Series-ზე შარშანაც მიიღო მონაწილეობა.
ევრო NASCAR-ის სერიებში წელს 4 ქართველი იასპარეზებს, KOLKHI GRT-ის გუნდის წარმომადგენლები და ასევე, საქართველოს საავტომობილო ფედერაციის მხარდაჭერით, შეჯიბრებაში სანდრო თავართქილაძე და სანდრო ქაჯაია ჩაერთვებიან.
NASCAR Euro Series - აპრილში აიღებს სტარტს და მოიცავს 12 ეტაპს, რომელიც 6 სხვადასხვა ქვეყანაში (ესპანეთი, იტალია, ინგლისი, ჩეხეთი, გერმანია, ბელგია) ჩატარდება.
KOLKHI GRT-ის დამფუძნებელმა, ირაკლი ჩიქოვანმა და გუნდის წევრებმა, დათა ქაჯაიამ და მარიამ დავითიძემ La Gazzetta dello Sport Georgia-სთან NASCAR Euro Series-ის შესახებ ისაუბრეს:
ირაკლი ჩიქოვანი:"NASCAR Euro-ზე შარშან ფედერაციიდან იასპარეზა ორმა მრბოლელმა, ფედერაციამ ევროპული გუნდი დაიქირავა და ქართველებმა მათი მანქანებით იასპარეზეს, ჩვენ შემთხვევაში გუნდი სრულად ქართულია, მანქანები ჩემ საკუთრებაშია. ტექნიკური პერსონალის ნაწილი ევროპიდან გვეხმარება. ჩვენი მიზანია, ტექნიკურადაც გუნდი სრულად ქართველთაგან დაკომპლექტდეს.
მნიშვნელოვანი სიახლეა, რომ ზუსტად ისეთივე სავარჯიშო მანქანა გვეყოლება, რაც შეჯიბრებაზე ივლის. მეორე მანქანა იქნება ევროპაში და ის იქნება საშეჯიბრო. რადგან ახლა ვაშენებთ გუნდს, აქ ამ მანქანის ქონა არის ძალიან მნიშვნელოვანი.
პირველი ქართული გუნდი იასპარეზებს და პირველი ქართველი ქალი მრბოლელი, 21 წლის მარიმ დავითიძე ჩაერთვება შეჯიბრებაში, ქალი პილოტი ძალიან მნიშვნელოვანია. დათა ქაჯაია პირველად ქართული ავტოსპორტის ისტორიაში pro კლასში მიიღებს მონაწილეობას, მარიამი open კლასში იასპარეზებს.
დათას შესახებ ყველამ კარგად ვიცით, რა დონის სპორტსმენია და ბოლომდე იბრძოლებს, იმედი ამქვს, რომ მარიამი კარგად გამოვა.
დათა და მარიამი ფიზიკურ კონდიციებზეც ვარჯიშობენ, რაც დამატებით სპორტ დარბაზს მოიცავს. შეჯიბრება მხოლოდ საჭე არაა, ეს ფიზიკურად დამღლელია და ფიზიკური მზაობა მნიშვნელოვანია.”
დათა ქაჯაია:"NASCAR-ი საავტომობილო სპორტის სერია ამერიკასა და ევროპაში - რა თქმა უნდა, მნიშვნელოვანი აქ მონაწილეობა, ძალიან დაძაბული ტურნირია, ბევრი მანქანა და ბევრი სხავადსხვა კლასია, ძალიან კონტაქტური რბოლები იმართება, რაც მაყურებელს იზიდავს, თითოეულ ეტაპს დაახლოებით 30-40 ათასი ადამინი ესწრება, მაღალია მედიაჩართულობა.
ამჟამად KOLKHI GRT-ს მრბოლელებს, შესაძლებლობა გვაქვს ანალოგიურ მანქანაზე ვივაჯიშოთ, მანქნის პარამეტრები უკეთ შევისწავლოთ და უფრო კონკურენტუნარიანები ვიყოთ. მინდა დიდი მადლობა გადავუხადო ბატონ ირაკლი ჩიქოვანს, რომელმაც ეს ყველაფერი საკუთარ თავზე აიღო.
წელს პირველად იქნება ქართული გუნდი საერთაშორისო ასპარეზზე, რაც წინ გადადგმული ნაბიჯია ქართული ავტოსპორტისთვს, ბევრ წარამტებულ სპორტსმენს ექნება ქართულ გუნდში მოხვედრის შესაძლებლობა, შესაბამის პირობებში ვარჯიში შეეძლება და საერთაშორისო ასპარზზე ქვეყნის წარმოჩენის შანსი მიეცემა.
ტექნიკური თავსაზრისით, ბევრი ქართველი შეისწავლის სპორტული ავტომობილის პარამეტრებს, განვითარებისთვის ეს ძალიან მნიშვნელოვანია. ყველაფერს გავაკეთებ, რათა KOLKHI GRT-ის სახელით ჩვენი ქვეყანა ვასახელო.
NASCAR-ის სერიები წელს ჩემთვის კიდევ ერთი ფაქტის გამო იქნება გამორჩეული, ჩემი შვილი იასპარეზებს, პირველი წელია იქნება მისთვის საერთაშორისო ასპარეზზე, შარშან სანდროს დებიუტი წრიულ რბოლებზე შედგა და კარგი შედეგი ჰქონდა."
მარიამ დავითიძე: "ასეთი მაღალი დონის ჩემპიონატში მონაწილეობა უდიდესი ნაბიჯია ჩემი კარიერისთვის. ამ დონის ჩემპიონატში მონაწილეობა ნიშნავს კონკურენციას გამოცდილ და ძლიერ მრბოლელებთან, რაც მუდმივად გაძალებს საკუთარი შესაძლებლობების ზღვარზე ყოფნას. იზრდება პასუხისმგებლობა, ყურადღება დეტალების მიმართ და პროფესიონალიზმის მოთხოვნა. თითოეული რბოლა არის გამოცდილების დაგროვება ტრასაზე გადაწყვეტილებების სისწრაფის, სტრატეგიული აზროვნებისა და სტაბილურობის თვალსაზრისით.
ჩემი მთავარი მიზანია, ქალთა ჩათვლაში დავიკავო პირველი ადგილი. მაქსიმალურად სტაბილური და პროგრესული შედეგების დაფიქსირება, გამოცდილების დაგროვება და საკუთარი პოტენციალის სრულად რეალიზება.
ჩემი გამოცდილება ავტოსპორტში ბავშობიდან იწყება. 8 წლიდან დავიწყე სამოყვარულო კარტინგზე სიარული. 2022 ში ბათუმის კარტინგის ჩემპიონი გავხდი, 2023 ში კოტეტას თასი მოვიგე 65 მამაკაცს შორის. შემდეგ დავიწყე მონაწილეობის მიღება ავტო სლალომის, სადაც უკვე 3 გზის ჩემპიონი ვარ და წელს მივემგზავრები საქართველოს ნაკრებთან ერთად Fia Motorsport Games-ზე.
კარიერის განმავლობაში მივიღე მონაწილეობა სხვადასხვა ფორმატისა და სირთულის შეჯიბრებში. რბოლამ მასწავლა დისციპლინა, სწრაფი გადაწყვეტილებების მიღება და ზეწოლისქვეშ მუშაობა, თვისებები, რომლებიც კრიტიკულად მნიშვნელოვანია პროფესიონალურ დონეზე გადასვლისთვის. ეს ყველაფერი ძალიან დამეხმარება ნასკარის ჩემპიონატზე საასპარეზოდ და თასის მოსაპოვებლად.”
NASCAR Euro Series-ის პირველ ეტაპს 18-19 აპილს ესპანეთის ქალაქი ვალენსია უამსპინძლებს.
