[პრევიუ] ბაიერნი გამარჯვების გემოს გახსენებას ლაიპციგთან ეცდება

ბავარიის, როგორც დაუმარცხებელი მანქანის, მოშლა დაიწყო ლევერკუზენის ბაიერთან განადგურებით, შემდეგ იყო მარცხი ჩემპიონთა ლიგაზე რომის ლაციოსთან, ბოლოს კი თავისი ზეიმი მოკრძალებულმა ბოხუმმაც მოიწყო. ალიანც არენაზე კრიზისია, რომელსაც სეზონის ბოლოს ტომას ტუხელის მთავარი მწვრთნელის პოსტიც შეეწირება.

ბუნდესლიგაში ჩატარებული 22 შეხვედრის შემდეგ, ბაიერნი ლიდერ "ფარმაცევტებს" ამ დროისთვის 11 ქულით ჩამორჩება. დაგვეთანხმებით, საკმაოდ უჩვეულოა მიუნხენელების ხილვა მდევრების როლში. ცხადია, დასრულებული ჯერ არაფერია, მაგრამ ობიექტურად, თუ რაიმე გაუთვალისწინებელი არ მოხდა, "შავ-წითლები" პირველ პოზიციას არ დათმობენ.

არსებობს მოსაზრება, რომ "რეკორდმაისტერი" ახალი სეზონისთვის გუნდში ბაიარენაზე დატრიალებული სასწაულის მთავარ შემოქმედს - ჩაბი ალონსოს - მოიყვანს. იქამდე ჯერ დიდი დროა, ბავარიის უახლოესი ამოცანა კი წაგებათა სერიის შეწყვეტაა. ვნახოთ, რამდენად მოხერხდება ეს ყველაფერი "წითელი ხარების" პირისპირ.

მოწინააღმდეგეს ალიანც არენას ბინადრებთან დაკავშირებით თავისი მოტივაცია და ანგარიშები აქვს. საქსონელები 40 ქულით მეხუთე ადგილზე არიან და მათი მთავარი მიზანი 4-ეულში შესვლაა, რომლამდეც დაშორება ერთ ქულას შეადგენს. რაც შეეხება სტატისტიკას, ტუხელის გუნდს მარკო როზეს კოლექტივთან სერიოზული უპირატესობა აქვს.

19 შეხვედრაში, ათჯერ იმარჯვა ბაიერნმა, ექვსი მატჩი დასრულდა ფრედ, სამი თამაში კი ლაიპციგმა მოიგო. სტუმრების მთავარი ღამის კოშმარი რობერტ ლევანდოვსკია, რომელმაც მათ კარში 9 ბურთი გაიტანა. ის ამჟამად ბარსელონაშია, მაგრამ მისი ადგილი ჰარი კეინმა დაიკავა, რაც რედ ბულისთვის პოტენციურად ასევე დიდ საფრთხეს წარმოადგენს.

ტომას ტუხელი (ბაიერნის მწვრთნელი): "ბაიერნში ახლა რთული პერიოდია, რასაც მე მაბრალებენ. არ მიმაჩნია, რომ ერთადერთი პრობლემა მე ვარ, მაგრამ დანაშაულის საკუთარ თავზე აღებისთვისაც მზად ვარ. შედეგებით კმაყოფილი არც მე ვარ, ახლა ყველაზე მნიშვნელოვანია ისევ მოგებათა სერიის გზაზე დადგომა".

მარკო როზე (ლაიპციგის მწვრთნელი): "ბაიერნის წინააღმდეგ თამაში ყოველთვის განსაკუთრებული მოვლენაა. არ აქვს მნიშვნელობა, თუ როგორ ფორმაში იმყოფებიან მიუნხენელები, ისინი ყოველთვის სახიფათოები არიან. არ მინდა ხმამაღალი განცხადების გაკეთება, მაგრამ მეტოქის სტატუსის მიუხედავად, მოედანზე მაქსიმალური შედეგის მისაღებად გავალთ".

ბაიერნის ბოლო 5 მატჩი: ბოხუმი-ბაიერნი 3:2, ლაციო-ბაიერნი 1:0, ლევერკუზენი-ბაიერნი 3:0, ბაიერნი-გლადბახი 3:1, აუგსბურგი-ბაიერნი 2:3;

ლაიპციგის ბოლო 5 მატჩი: ლაიპციგი-გლადბახი 2:0, ლაიპციგი-რეალი 0:1, აუგსბურგი-ლაიპციგი 2:2, ლაიპციგი-უნიონი 2:0, შტუტგარტი-ლაპიციგი 5:2;

ბაიერნი: ნოიერი, დე ლიხტი, კიმი, გერერო, დევისი, კიმიხი, გორეცკა, მიულერი, სანე, მუსიალა, კეინი.

დანაკლისი: კომანი, სარი, მაზრაუი, ლაიმერი, ბოე, პერეცი, ბუკმანი.

ლაიპციგი: გულაჩი, ორბანი, სიმაკანი, ჰენრიქსი, რაუმი, შლაგერი, ჰაიდარა, ოლმო, სიმონსი, ოპენდა, შეშკო.

დანაკლისი: პოულსენი, კლოსტერმანი, კოლერი.

ბუნდესლიგა, 23-ე ტური, 21:30 (თბილისის დროით);

ალიანც არენა, მიუნხენი;

მთავარი მსაჯი: საშა შტეგემანი;