[პრევიუ] ბოლო 1/2 ფინალისტი ბერლინში გამოვლინდება — ნიდერლანდები V თურქეთი

2024 წლის ევროპის ჩემპიონატის ბოლო 1/2 ფინალისტის ვინაობა ბერლინში, ოლიმპიაშტადიონზე გაირკვევა, სადაც ერთმანეთს ნიდერლანდები და თურქეთი დაუპირისპირდებიან — მატჩი თბილისის დროით 23:00 საათზე დაიწყება.

კენჭისყრის შედეგად ნიდერლანდების ეროვნული ნაკრები D ჯგუფში მოხვდა, სადაც 4 ქულით მე-3 ადგილი დაიკავა და პლეიოფში გავიდა. რონალდ კუმანის გუნდმა პოლონეთს მოუგო, საფრანგეთთან ფრე ითამაშა და ავსტრიასთან დამარცხდა. 1/8 ფინალში კი "ნარინჯისფრებმა" რუმინეთი 3:0 დაამარცხეს.

F ჯგუფში ასპარეზობდა თურქეთის ეროვნული ნაკრები — მონტელას გუნდმა პირველ ტურში საქართველო დაამარცხა, შემდეგ პორტუგალიასთან წააგო და ბოლო ტურში ჩეხეთს მოუგო. თურქეთმა 6 ქულით მეორე ადგილი დაიკავა და 1/8 ფინალში ავსტრიას დაუპირისპირდა, რომელსაც დაძაბულ ბრძოლაში, 2:1 აჯობა.

ნიდერლანდებისა და თურქეთის ეროვნული ნაკრებები ერთმანეთს ბოლოს 2021 წელს მსოფლიო ჩემპიონატის საკვალიფიკაციო ეტაპზე შეხვდნენ, სადაც "ნარინჯისფრებმა" მეტოქე 6:1 გაანადგურეს. ბოლო 5 ურთიერთდაპირისპირებაში კი ნიდერლანდებს მცირე უპირატესობა აქვს — 2 მოგება, 2 ფრე და 1 წაგება.

დღევანდელ მატჩს დიდი დანაკლისით ხვდება მონტელას გუნდი — დისკვალიფიკაციის გამო, მოედანზე დემირალი, ქოქჩიუ და იუქსექი ვერ გამოვლენ. ნიდერლანდებს კი შესაძლოა მატიას დე ლიგტი ვერ დაეხმაროს.