[პრევიუ] ევრო 2025 | ნახევარფინალური დაპირისპირებების მოლოდინში

სლოვაკეთში, ევროპის ახალგაზრდული ჩემპიონატი გრძელდება. მაყურებელი დღეს ორ ნახევარფინალურ დაპირისპირებას იხილავს. ერთმანეთს ინგლისი-ნიდერლანდები და გერმანია-საფრანგეთი დაუპირისპირდებიან. პირველი მატჩი თბილისის დროით 20:00 საათზე დაიწყება, ხოლო მეორე დაპირისპირება სტარტს 23:00 საათზე აიღებს.

ინგლისმა 1/4 ფინალში ტურნირის ერთ-ერთი ფავორიტი ესპანეთი საკმაოდ მარტივად, 1-3 დაამარცხა, ხოლო მისმა მეტოქემ ნიდერლანდებმა პორტუგალიის ბარიერი საკმაოდ მძიმე ბრძოლაში გადალახა. მაიკლ რაიციგერის გუნდმა პორტუგალიას მინიმალური ანგარიშით, 0-1 მოუგო.

რაც შეეხება მეორე წყვილს, გერმანიამ მძიმე ბრძოლაში იტალია 3-2 დაამარცხა, ხოლო საფრანგეთმა უხვგოლიან დაპირისპირებაში დანიას ამავე ანგარიშით, 2-3 აჯობა.

ევროპის ჩემპიონატის ფინალი 28 ივნისს გაიმართება.