[პრევიუ] ევროპა ლიგა დაბრუნდა: მილანი და რომა საქმეში ერთვებიან

ჟულიენ სტეფანი (რენის მწვრთნელი): "ჩვენ ვეთამაშებით ძალიან დიდ გუნდს, რომლის რიგებშიც ბევრი ფრანგი ფეხბურთელია, ისინი ნაკრების წევრები არიან და მათი შესაძლებლობების შესახებ ყველამ კარგად ვიცით. მათ გარდა, მილანს ბევრი სხვა ტოპ მოთამაშეც ჰყავს. ისინი აშკარა ფავორიტები არიან, მაგრამ ჩვენ დიდ ბრძოლას გპირდებით. არ ვაპირებთ მოედანზე უსაქმოდ ყოფნას."

მილანის ბოლო 5 მატჩი: მილანი-ნაპოლი 1:0, ფროზინონე-მილანი 2:3, მილანი-ბოლონია 2:2, უდინეზე-მილანი 2:3, მილანი-რომა 3:1.
რენის ბოლო 5 მატჩი: ლე ავრი-რენი 0:1, სოშო-რენი 1:6, რენი-მონპელიე 2:1, ლიონი-რენი 2:3, რენი-მარსელი 1:1 (პენალტების სერია 9:8).

მილანსა და რენს ამ შეხვედრამდე ერთმანეთის წინააღმდეგ არასდროს არ უთამაშიათ.

გუნდების სავარაუდო შემადგენლობები:

მილანი: მენიო, ფლორენცი, გაბია, კიაერი, ტეო, მუსა, რაინდერსი, პულისიკი, ლოფტუს-ჩიკი, ლეაო, ჟირუ.
დანაკლისი: მირანტე, კალაბრია, ტომორი, კალულუ, პობეგა.

რენი: მანდანდა, ფრანსუა, ომარი, ტეატი, ტრუფერტი, ბურიჟო, სანტამარია, მატუსივა, დუე, კალიმუენდო, ტერიე.
დანაკლისი: ლე ფი, რიდერი.

მილანი - რენი
ევროპა ლიგა, 1/16 ფინალი;
15 თებერვალი, 23:45 (თბილისის დროით);
სან სირო, მილანი;
მთავარი მსაჯი: ნიკოლა დაბანოვიჩი;

ევროპა ლიგის კიდევ ერთ გამორჩეულ დაპირისპირებას, როტერდამში ვიხილავთ, სადაც ადგილობრივი ფეინოორდი იტალიურ რომას უმასპინძლებს.

გუნდები ამ შეხვედრას განსხვავებული ფორმით ხვდებიან - არნე სლოტის გუნდს საკმაოდ კარგი შედეგი აქვს, გუნდს 14 იანვრის შემდეგ არ წაუგია. მეორე მხრივ, დე როსის გუნდი ამ მატჩს დიდი მარცხით ხვდება - "ჯალოროსი" ბოლო ტურში, სტადიო ოლიმპიკოზე ინტერთან ვერაფერს გახდა და 4-მატჩიანი მოგებათა სერიის დასრულება მოუწია.

ფეინოორდი ერედივიზიონში მე-2 ადგილზე იმყოფება და ლიდერ პსვ-ს 10 ქულით ჩამორჩება. დე როსის რომას კი სერია ა-ში მე-6 ადგილი უკავია. გუნდებს განსხვავებული მიზნები აქვთ, სლოტის გუნდი ჯერ კიდევ საჩემპიონო რბოლაში რჩება, რომაელები კი ჩემპიონთა ლიგის საგზურისთვის დიდ ბრძოლაში არიან ჩართულები.

არნე სლოტი (ფეინოორდის მწვრთნელი): "შურისძიებაზე საუბარი არ მსურს, მე მხოლოდ ამ მატჩის მოგება მინდა. მოურინიო? მას დიდი სიამოვნებით კიდევ ერთხელ შევხვდებოდი. არ ვფიქრობ, რომ რომა ახალმა მწვრთნელმა ძალიან შეცვალა. ინტერთან შეხვედრას ვუყურე და ვფიქრობ, რომ დიდი ცვლილებები არაა. არის რომა ფავორიტი? თუ ისტორიას ჩავხედავთ, კი, ეგრეა, მაგრამ ჩვენ ახალი ისტორიის დაწერას შევეცდებით, ეს დიდი გამოწვევაა."

დანიელე დე როსი (რომას მწვრთნელი): "ბედნიერი ვარ ევროპა ლიგაზე დებიუტით. ამას ასე მალე არ ველოდი, ცოტა ამაღელვებელი მომენტია, მაგრამ მზად ვარ. 14 თებერვალს ჩემი ქალიშვილის დაბადების დღეა, ზუსტად 1 წლის წინ, სპალიდან გამომიშვეს, ახლა კი აქ ვარ. ფეინოორდმა კარგი და გამართული ფეხბურთის თამაში იცის, მათ ზურგს კი გულშემატკივრები გაუმაგრებენ. მოურინიოს რომას ვაკვირდებოდი და ბევრ რამეს ვსწავლობდი, ახლა ვეცდები ჩემი იდეებით გუნდი განვავითარო. როტერდამში რთული მატჩი გველოდება, თუმცა ჩემი ბიჭების იმედი მაქვს.“

ფეინოორდის ბოლო 5 მატჩი: ფეინოორდი-სპარტა როტერდამი 2:0, ფეინოორდი-ალკმაარი 2:0, ალკმაარი-ფეინოორდი 0:1, ფეინოორდი-ტვენტე 0:0, ფეინოორდი-პსვ 1:0.
რომას ბოლო 5 მატჩი: რომა-ინტერი 2:4, რომა-კალიარი 4:0, სალერნიტანა-რომა 1:2, ალ-შაბაბი-რომა 1:2, რომა-ჰელას ვერონა 2:1.

ურთიერთშეხვედერები (ბოლო 5 მატჩი): რომა-ფეინოორდი 4:1, ფეინოორდი-რომა 1:0, რომა-ფეინოორდი 1:0, ფეინოორდი-რომა 1:2, რომა-ფეინოორდი 1:1.

გუნდების სავარაუდო შემადგენლობები:

ფეინოორდი: ველენროიტერი, გეენტრუიდა, ბეელენი, ჰანკო, ჰარტმანი, ვიფერი, ზერუქი, მინტეჰი, სტენგსი, პაიშაო, უედა.
დანაკლისი: ბილოუ, ვან დელ ბელტი, ტიმბერი, ტრაინერი.

რომა: სვილარი, კარსდორპი, მანჩინი, ჰუისენი, ანხელინიო, კრისტანტე, პარედესი, პელეგრინი, დიბალა, ლუკაკუ, ელ შაარავი.
დანაკლისი: აბრაჰამი, ნ’დიკა.

ფეინოორდი - რომა
ევროპა ლიგა, 1/16 ფინალი;
15 თებერვალი, 21:45 (თბილისის დროით);
დე კიპი, როტერდამი;
მთავარი მსაჯი: რადუ პეტრესკუ;


ამ ორი გამორჩეული მატჩის გარდა, ევროპა ლიგის 1/16 ფინალში კიდევ 6 შეხვედრას ვიხილავთ:

გალათასარაი - სპარტა პრაღა, 21:45 საათი:
თურქული გრანდი ამ დაპირისპირებაში გამოკვეთილი ფავორიტია და ზოგადად, ოკან ბურუქის გუნდი, ამ ტურნირზე ერთ-ერთი ლიდერად მოიაზრება. ჩეხური გუნდი კი ამ მატჩს ძალიან კარგ ფორმაში ხვდება - პრისკეს გუნდს 12 ნოემბრის შემდეგ თამაში არ წაუგია.

იანგ ბოიზი - სპორტინგი, 21:45 საათი:
პორტუგალიური გუნდი ამ შეხვედრას კარგ ფორმაში ხვდება - რუბენ ამორინის გუნდი პორტუგალიის ლიგის საჩემპიონო რბოლაშია ჩართული და ბენფიკასთან ერთად, ჩემპიონატში, 52 ქულით, მოწინავე პოზიციაზეა. რაც შეეხება მასპინძელ გუნდს, იანგ ბოიზი შვეიცარიის სუპერ ლიგას დიდი ჰანდიკაპით ლიდერობს, მეორე ადგილზე მყოფ გუნდს 7 ქულით ასწრებენ. მომდევნო ეტაპზე გასვლის შანსი, ალბათ ორივე გუნდს თანაბარი აქვს.

კიდევ ერთი გამორჩული მატჩი, რომელიც ადრეულ სესიაში იქნება, შახტარი - მარსელია. სამივე ქართველი ფეხბურთელი მატჩის განაცხადში იქნება და ვიმედოვნებთ, რომ დიდ სათამაშო დროსაც მიიღებენ. უკრაინული გუნდი ამ მატჩს ცოტა ფორმიდან ამოვარდნილი ხვდება, რადგან ჩემპიონატში ჯერ კიდევ ზამთრის შესვენებაა. რაც შეეხება გატუზოს გუნდს, ფრანგები ცუდ ფორმაში არიან. ამ მატჩს გუნდი 5-მატჩიანი მოუგებელი სერიით ხვდება. ამ მომენტისთვის, მარსელი ლიგა 1-ში მე-8 პოზიციაზე იმყოფება და ოთხეულს 7 ქულით ჩამორჩება.

რაც შეეხება გვიანი სესიის მატჩებს, მილანი - რენის გარდა, კიდევ სამ შეხვედრას ვიხილავთ.

ბენფიკა - ტულუზა, 00:00 საათი:
როჯერ შმიდტის "არწივებს" საკმაოდ ძლიერი შემადგენლობა ჰყავთ და ამ დაპირისპირებაში მთავარი ფავორიტებიც არიან. ფრანგული გუნდი კი ცუდ ფორმაშია. წარმატებული 2022/23 სეზონის შემდეგ, ტულუზა ახლა გასავარდნ ზონასთან ახლოს იმყოფება და გადარჩენისთვის იბრძვის.

ბრაგა - ყარაბახი, 00:00 საათი:
ფურცელზე თითქოს ფავორიტი პორტუგალიური გუნდი მოჩანს, თუმცა ბოლო წლებმა კარგად დაგვანახა, რომ აზერბაიჯანული გუნდი, ადვილი მეტოქე არავისთვისაა. ყარაბახის ღირსებას იცავს ქართველი მეკარე, ლუკა გუგეშაშვილი.

ლანსი - ფრაიბურგი, 00:00 საათი:
ფრანგები ამ წყვილში ფავორიტად მოიაზრებიან. ამ შეხვედრასაც, ისინი უფრო კარგ ფორმაში ხვდებიან, ვიდრე გერმანელები. ამას ისიც ემატება, რომ ფრაიბურგს ძალიან ბევრი ტრავმირებული ფეხბურთელი ჰყავს.