[პრევიუ] გამოკვეთილი ფავორიტი სიტია, მაგრამ პირველი წრის მატჩი ყველას გვახსოვს

პრემიერ ლიგის 25-ე ტურში, საკმაოდ საინტერესო დაპირისპირებას ვიხილავთ. მე-2 ადგილზე მყოფი, პეპ გვარდიოლას გუნდი მაურისიო პოჩეტინოს ჩელსის დაუხვდება. იმის მიუხედავად, რომ გუნდებს შორის სხვაობა 18 ქულაა, მაინც საინტერესო სანახაობას ველდოებით, ამის საფუძველს პირველი წრის დაპირისპირება გვაძლევს - სტემფორდ ბრიჯზე სეზონის ერთ-ერთი საუკეთესო მატჩი ვიხილეთ, რომელიც საბოლოოდ 4:4 დასრულდა.

გვარდიოლას გუნდი ძალიან კარგ ფორმაშია - გუნდის ორი წამყვანი ფეხბურთელი, დე ბრუინი და ჰოლანდი, ტრავმების შემდეგ საოცარ ფორმაში დაბრუნდნენ. სიტი ჩემპიონთა ლიგაზეც კარგად გამოვიდა, „ქალაქელებმა“ კოპენჰაგენი 1:3 დაამარცხეს და მომდევნო ეტაპს მიუახლოვდნენ.

ამ მატჩს კარგ ხასიათზე ხვდება ჩელსიც, რომელმაც ბოლო ტურში ლონდონურ დერბიში გამარჯვება შეძლო, პოჩეტინოს გუნდმა, კრისტალ პალასი 1:3 დაამარცხა. საოცარ ფორმაშია პალმერი, რომელიც უბრალოდ შეუჩერებელია, მის ანგარიშზე 10 გოლი და 6 საგოლე გადაცემაა. 21 წლის ინგლისელი ჩელსის მთავარი იარაღია.

გვარდიოლას კომენტარი (მან. სიტის მწვრთნელი): "ჩელსის პროექტი ძალიან მომწონს, გუნდი ნიჭიერი ფეხბურთელებით არის დაკომპლექტებული. ყველა პოზიციაზე საკმაოდ ძლიერი კადრები ჰყავთ და ვფიქრობ, რთული მატჩი გველოდება. ამ გუნდს ყველაფერი აქვს წარმატების მისაღწევად. მარტივი გასეირნება არ გველოდება, ვიცი რომ როგორც პირველ წრეში, ახლაც რთული შეხვედრა გამოვა."