[პრევიუ] ქართული ტრიოს დიდი გამოცდა ევროტურნირებზე და კანკავა-კაშია კიტეიშვილის წინააღმდეგ

კონფერენს ლიგის 1/16 ფინალში ერთმანეთს ქართველები დაუპირისპირდებიან - ოთარ კიტეიშვილის შტურმი კანკავა/კაშიას სლოვან ბრატისლავას წინააღმდეგ.

ფურცელზე ფავორიტი შტურმია, მაგრამ სლოვანიც კარგ ფორმაშია და სლოვაკეთის ჩემპიონატში წარმატებულად ასპარეზობს.

ბევრი ტრავმიანობის შემდეგ, ოთარ კიტეიშვილი კარგ ფორმაში შედის, ყველა მატჩს ძირითადიდან იწყებს და ავსტრიის ჩემპიონატის გასულ ტურში უშუალო კონკურენტ ზალცბურგს გამარჯვების გოლი გაუტანა.

კიტეიშვილი უკვე წლებია შტურმის მაისურით გამოდის და ამ გუნდის ლიდერად იქცა. 

კიტეიშვილს არ ჩამორჩა ჯაბა კანკავა და წინა ტურში თავისი გოლი მანაც გაიტანა. ისე კი, კანკავა ტრადიციულად კარგ ფორმაშია, რამდენიმე კვირის წინ ის ვლადიმირ ვაისმა შეაქო და თქვა, რომ ნამდვილი პროფესიონალია. 

საქართველოს ნაკრების ვიცე-კაპიტანი გურამ კაშია რამდენიმე მატჩი სათადარიგოთა სკამზე იყო, გასულ ტურში კი მანაც კარგად ითამაშა და ერთ-ერთი ყველაზე მაღალი შეფასება მიიღო. შტურმის წინააღმდეგ ორივე მათგანს ძირითად შემადგენლობაში უნდა ველოდოთ.

ავტრიის ჩემპიონატის მიმდინარე სეზონში შტურმს 38 ქულა აქვს და ლიდერ ზალცბურგს მხოლოდ 2 ქულით ჩამორჩება, მათ ჩემპიონობის რეალური შანსი აქვთ. რაც შეეხება სლოვანს, 48 ქულით სლოვაკეთის ჩემპიონატის უპირობო ლიდერები არიან და დიდი ალბათობით, ჩემპიონები კიდევ ერთხელ გახდებიან.

შტურმის ბოლო 5 მატჩი: ზალცბურგი-შტურმი 1:1, შტურმი-აუსტრია 2:0, შტურმი-რუხი 0:0, დნიპრო-შტურმი 1:2, შტურმი-პოგონი 1:6

სლოვანის ბოლო 5 მატჩი: ზილინა-სლოვანი 0:4, სლოვანი-ბრავო 1:1, ალ-ვაკრა-სლოვანი 1:4, ალ-რეიანი-სლოვანი 2:2, დინამო მოსკოვი-სლოვანი 2:1

ქართული ტრიო დიდი გამოწვევის წინაშეა - ევროპა ლიგის 1/16 ფინალში შახტარის მეტოქე მარსელია. დონეცკელები თურქულ შეკრებაზე იყვნენ, ახლა კი საშინაო მატჩის ჩასატარებლად გერმანიაში ჩავიდნენ.

მოგეხსენებათ, უკრაინულ გრანდში 3 ქართველი ფეხბურთელი - ირაკლი აზაროვი, გიორგი გოჩოლეიშვილი და ლუკა ლაცაბიძე თამაშობს. ეს უკანასკნელი გუნდს ახლახანს შეუერთდა და უკვე ევროპა ლიგის განაცხადში შეიყვანეს.

მიუხედავად იმისა, რომ შახტარი ჩემპიონთა ლიგის ჯგუფში ჩარჩა, აზაროვისთვის და გოჩოლეიშვილისთვის იქ თამაში სარფიანი გამოდგა, ორივე მათგანმა ბარსელონას წინააღმდეგ საგოლე გადაცემა გააკეთა. გოჩოლეიშვილი საერთოდ ტურის სიმბოლურ გუნდში მოხვდა.

შახტარს წელს ოფიციალური მატჩი არ ჩაუტარებია და ამ მნიშვნელოვან თამაშს ასე ხვდება, თუმცა ისიც უნდა აღინიშნოს, რომ მარსელი საშინელ ფორმაშია და ლიგა 1-ში თამაშს ვერ იგებს. 30 ქულით მე-8 პოზიციაზე არიან.

სამაგიეროდ, გოჩოლეიშვილმა თურქეთში მოსამზადებელ ეტაპზე ამხანაგურ მატჩში თავისი გოლი გაიტანა და თერთმეტმეტრიანი ზუსტად შეასრულა. სასიამოვნო იქნება, თუ ასეთ პრინციპულ მატჩში ორივე მათგანს ძირითად შემადგენლობაში ვიხილავთ.

შახტარის ბოლო 5 მატჩი: ლეხია-შახტარი 1:1, შახტარი-არკადაგი 4:1, შახტარი-ველესი 2:3, შახტარი-ჰრადეცი 0:2, შახტარი-მარიბორი 0:0