[პრევიუ] ქართველების დუელი დუბლი 2, შახტარი მნიშვნელოვან მატჩს გამართავს

სლოვანი - შტურმი 23:00

კონფერენს ლიგის 1/16 ფინალის განმეორებით მატჩში ერთმანეთს ქართველები დაუპირისპირდებიან - ოთარ კიტეიშვილის შტურმი კანკავა/კაშიას სლოვან ბრატისლავას წინააღმდეგ.

მეორე მატჩის წინ, შტურმმა იმდენად კომფორტული უპირატესობა შეიქმნა, რომ უდიდესი ალბათობით შემდეგ ეტაპზე ვიხილავთ. მათ შინ მეტოქე 4:1 გაანადგურეს.

სასიხარულია, რომ ამ გამარჯვებაში თავისი წვლილი ოთარ კიტეიშვილმაც შეიტანა, რომელმაც მორიგი წარმატებული მატჩი ჩაატარა, პენალტი გამოიმუშავა და თავად გაიტანა.

ტრავმების შემდეგ, კიტეიშვილი კარგ ფორმაში შედის, რაც სასიხარულოა, რადგან საქართველოს ნაკრების ისტორიულ მატჩებამდე 1 თვეა დარჩენილი.

პირველ შეხვედრაში ძირითად შემადგენლობაში იყვნენ სლოვანის გამოცდილი ქართველები გურამ კაშია და ჯაბა კანკავა, რომლებიც დღეს სენსაციის დაფიქსირებას და 4:1-დან თამაშის შემოტრიალებას შეეცდებიან, რაც ურთულესი დავალებაა.

შტურმის ბოლო 5 მატჩი: შტურმი-რაპიდი 1:1, შტურმი-სლოვანი 4:1, ზალცბურგი-შტურმი 1:1, შტურმი-აუსტრია 2:0, შტურმი-რუხი 0:0

სლოვანის ბოლო 5 მატჩი: სლოვანი-მორავცე 4:1, შტურმი-სლოვანი 4:1, ზილინა-სლოვანი 0:4, სლოვანი-ბრავო 1:1, ალ-ვაკრა-სლოვანი 1:4

მარსელი - შახტარი 23:00

ქართველების შახტარისთვის პირველი მატჩი დრამატული გამოდგა. გერმანიაში გამართული მატჩი, სადაც ნომინალური მასპინძელი უკრაინული კლუბი იყო, ფრედ 2:2 დასრულდა. შახტარი წაგებას ბოლო წამზე გადაურჩა.

მოგეხსენებათ, უკრაინულ გრანდში 3 ქართველი ფეხბურთელი - ირაკლი აზაროვი, გიორგი გოჩოლეიშვილი და ლუკა ლაცაბიძე თამაშობს. ეს უკანასკნელი გუნდს ახლახანს შეუერთდა და უკვე ევროპა ლიგის განაცხადში შეიყვანეს.

პირველ შეხვედრაში აზაროვი ძირითად შემადგენლობაში იყო და 90 წუთი ითამაშა, გოჩოლეიშვილი კი მოედანზე 77-ე წუთზე გამოჩნდა. არ არის გამორიცხული, დღეს ორივე მათგანი ძირითადში ვიხილოთ.

აზაროვმა და გოჩოლეიშვილმა შახტართან ერთად თურქული შეკრება გაიარეს და კარგ ფიზიკურ კონდიციებში არიან.

მოგეხსენებათ, შახტარში თავისი კვალი უკვე ორივემ დატოვა. ჩემპიონთა ლიგის მატჩებში ბარსელონასთან საგოლე გადაცემა ჯერ აზაროვმა გააკეთა, შემდეგ კი გოჩოლეიშვილმა.

შახტარის ბოლო 5 მატჩი: შახტარი-მარსელი 2:2, ლეხია-შახტარი 1:1, შახტარი-არკადაგი 4:1, შახტარი-ველესი 2:3, შახტარი-ჰრადეცი 0:2

მარსელის ბოლო 5 მატჩი: ბრესტი-მარსელი 1:0, შახტარი-მარსელი 2:2, მარსელი-მეცი 1:1, ლიონი-მარსელი 1:0, მარსელი-მონაკო 2:2