დღეს, 23:00 საათზე, მსოფლიო საკლუბო ჩემპიონატის ჯგუფური ეტაპის ფარგლებში პარის სენ-ჟერმენი ატლეტიკო მადრიდს დაუპირისპირდება. აღნიშნული კლუბები აქამდე ერთმანეთს შეხვდნენ მხოლოდ ერთხელ, ჩემპიონთა ლიგის გასული სეზონის ფაზის მე-4 ტურში, როდესაც პსჟ-მ შინ 1:2 წააგო.
ეს იყო პერიოდი, როდესაც პარიზელებს ჯერ კიდევ არ ჰყავდათ ხვიჩა კვარაცხელია და ჩემპიონთა ლიგის ფავორიტების სიაში ისინი არც კი ფიგურირებდნენ. თავად განსაჯეთ: "როხიბლანკოსთან" წაგების შემდეგ, ლუის ენრიკეს გუნდი იმ მომენტისთვის 4 ქულით 25-ე პოზიციამდე იყო ჩამოქვეითებული.
როგორც აღვნიშნეთ, პარკ დე პრენსზე ჯერ კიდევ არ იყო გადმოსული ქართველი გარემარბი, მის ნაცვლად კი დიეგო სიმეონეს გუნდთან მატჩში უსმან დემბელეს პარტნიორები შეტევაში მარკო ასენსიო და ბრედლი ბარკოლა იყვნენ. მოგვიანებით, სათადარიგოთა სკამიდან რანდალ კოლო მუანი და დეზირე დუე შემოვიდნენ.
რა შეიცვალა ნაპოლის ყოფილი ლიდერის პარის სენ-ჟერმენში გადმოსვლით? ესპანელ გარემარბსა და კოლო მუანის მოუწიათ სხვა გუნდებში გადასვლა, ბარკოლა კი ძირითადიდან ამოვარდა. პსჟ-ში ჩამოყალიბდა ახალი შემტევი ტრიო: კვარაცხელია, დემბელე, დუე - 3-ეული, რომელიც მეტროპოლიტანოს ბინადრებთან წაგებიდან რამდენიმე თვის შემდეგ, მთავარ საკლუბო ტურნირს მოიგებს.
