პარის სენ-ჟერმენი იტალიელი მწვრთნელებისთვის უკანასკნელ წლებში ერთგვარ განაჩენად იქცა. მასიმილიანო ალეგრი, სიმონე ინძაგი, რობერტო დე ძერბი, ფრანჩესკო ფარიოლი და კარლო ანჩელოტიც კი. აღნიშნული სპეციალისტების კარიერის მთავარი შავი ლაქა სწორედ პსჟ-ს უკავშირდება.
დავიწყოთ ანჩელოტით, ვისაც მიუნხენის ბაიერნში მწვრთნელობის დროს სწორედ "ლურჯ-წითლებთან" განადგურება (0:3) არ აპატიეს. იტალიელი სპეციალისტი გაუშვეს 2017/18 სეზონის დასაწყისში და ეს ყველაფერი იმის გათვალისწინებით, რომ მას "რეკორდმაისტერში" იმ მომენტისთვის მოგებული ჰქონდა გერმანიის ჩემპიონატი, ქვეყნის თასი და სუპერ თასიც.
კარლოს გუნდის მარცხი პარკ დე პრენსის ბინადრებთან მოხდა ჩემპიონთა ლიგის ჯგუფური ეტაპის მეორე ტურში, ანუ მაშინ, როდესაც მერვედფინალში ვერგასვლის მცირე საფრთხეც კი არ არსებობდა. აღნიშნული გარემოება ბაიერნის იმდროინდელი დამრიგებლის გაშვების ფაქტს კიდევ უფრო უსამართლოს ხდის.
რაც შეეხება ალეგრის, უნდა გავიხსენოთ ტურინის იუვენტუსის უკანასკნელი სეზონი ჩემპიონთა ლიგაზე მისი მწვრთნელობით. საუბარია 2022/23-ზე, მაშინ, როცა იტალიელმა სპეციალისტმა ერთადერთხელ თავის კარიერაში ჯგუფური ეტაპის გადალახვა ვერ შეძლო. "ბიანკონერის" ერთ-ერთი მოწინააღმდეგე იყო კრისტოფ გალტიეს გუნდი, რომელმაც ორივე შეხვედრა მოიგო.
მივადექით ისეთ მწვრთნელს, ვინც ამ სიიდან პარის სენ-ჟერმენისგან ყველაზე მძიმედ იზარალა. საუბარია ინძაგის შესახებ და გამანადგურებელ წაგებაზე (0:5) ევროპის მთავარი საკლუბო ტურნირის ფინალში. ეს იყო მილანის ინტერის ბოლო თამაში იტალიელი ტაქტიკოსის მეთაურობით.
როგორც აღვნიშნეთ, ამ სიას შეუერთდა დე ძერბიც, ვისაც ლიგა 1-ის გასულ ტურში პსჟ-სთან განცდილი 0:5 არ აპატიეს. ამ მატჩამდე ცოტა ხნით ადრე, მარსელის ოლიმპიკმა "ლურჯ-წითლებთან" საფრანგეთის სუპერ თასზეც წააგო. ცნობისთვის, იტალიელ სპეციალისტამდე, 5-ბურთიანი სხვაობით ლე კლასიკში არავინ დამარცხებულა.
ბოლოს გავიხსენოთ ფარიოლიც, ვისი ფრანგული კარიერაც შესაძლოა ყოფილიყო შთამბეჭდავი და დასამახსოვრებელი, რომ არა ლუის ენრიკეს გუნდი. პარკ დე პრენსის ბინადრებმა იტალიელი სპეციალისტის ნიცა ჯერ გამოაგდეს საფრანგეთის თასის 1/4 ფინალიდან, შემდეგ კი ევროპის მთავარი საკლუბო ტურნირის საგზურის მოპოვებისთვის ბრძოლას გამოთიშეს.
