ჩემპიონთა ლიგის მიმდინარე სეზონის ფინალში პარის სენ-ჟერმენი მილანის ინტერს დაუპირისპირდება. ფრანგული გუნდი ევროპის ყველაზე პრესტიჟულ საკლუბო ტურნირზე ერთ-ერთი ყველაზე ახალგაზრდაა, რომლის საშუალო ასაკი 23.3-ს შეადგენს. "ნერაძურისთან" მოგების შემთხვევაში, პსჟ-მ შესაძლოა ახალი რეკორდი დაამყაროს.
საკმაოდ მაღალია იმის ალბათობა, რომ პარიზული გუნდი გახდეს ჩემპიონთა ლიგის გამარჯვებული ყველაზე ახალგაზრდა კოლექტივი. ამჟამინდელი რეკორდი ეკუთვნის ამსტერდამის აიაქსის საჩემპიონო გუნდს, 1994/95 წლების სეზონში, საშუალო ასაკით 23.0.
ტურნირის მიმდინარეობისას "ებრაელების" საშუალო ასაკი იყო 25.6, თუმცა უშუალოდ ფინალში მათი საშუალო ასაკი, როგორც აღვნიშნეთ, 23.0 გახლდათ. ლუის ენრიკეს გუნდში ჭარბობენ სწორედ ახალგაზრდა მოთამაშეები და აქედან გამომდინარე, არ იქნება გასაკვირი, თუ კრუიფ არენას ბინადრების რეკორდი წელს მოიხსნება.
რაც შეეხება 30 წლის წინანდელ ფინალს, ლუი ვან გაალის გუნდმა პატრიკ კლუივერტის გოლით მილანი დაამარცხა. იმ მატჩში გამარჯვებული აიაქსის მხრიდან მონაწილეობა მიიღო სამმა მოზარდმა: 19 წლის კლარენს ზეედორფმა, 18 წლის ნვანკვო კანუმ და ერთადერთი გოლის ავტორმა ასევე 18 წლის ნიდერლანდელმა ფორვარდმა.
