პარის სენ-ჟერმენის ყოფილი ნახევარმცველი, დანიელ ბრავო, ვინც BeIN Sports-ზე მუშაობს საფეხბურთო ექსპერტად, სამსახურის გარეშე დარჩა. მიზეზი: სექსისტური ხუმრობა, რომელიც ფრანგმა ყოფილმა შუახაზელმა მარსელის ოლიმპიკისა და პარიზის (2:2) შეხვედრის დროს გააჟღერა.
ერთ-ერთ ეპიზოდში კამერამ დააფიქსირა საფრანგეთის ქალთა ნაკრების ყოფილი წევრი და დედაქალაქური გუნდის ამჟამინდელი სპორტული დირექტორი, გაეტან ტინე, რომელიც მის გვერდით მჯდომ ქალბატონს ესაუბრებოდა. პსჟ-ს ყოფილმა შუახაზელმა სწორედ იმ მომენტში იხუმრა.
"თამაშს არ აქცევენ დიდ ყურადღებას, ალბათ თეთრეულზე საუბრობენ", - ასეთი იყო 62 წლის ყოფილი ნახევარმცველის გამონათქვამი. ვეტერანი ფეხბურთელის სამსახურიდან დათხოვნა დაადასტურა BeIN Sports-ის დირექტორმა, ფლორან უზომ.
