საფრანგეთის ნაკრების ყოფილმა მთავარმა მწვრთნელმა, რაიმონდ დომენეკმა გააკრიტიკა პარის სენ-ჟერმენის მეკარე, მატვეი საფონოვი. "მამლების" ექს-თავკაცის თქმით, რუსი გოლკიპერი არ არის მსოფლიო კლასის და ის მნიშვნელოვნად ჩამოუვარდება პსჟ-ს ყოფილ კარის დარაჯს, ჯიჯო დონარუმას.
"პარის სენ-ჟერმენის სუსტი წერტილი? მეკარე. საფონოვი არ არის მსოფლიო დონის კარის დარაჯი. ის ჩამოუვარდება როგორც დონარუმას, ისე შევალიესაც. მატვეიმ მხოლოდ იმიტომ დაიკავა ადგილი პსჟ-ს ძირითადში, რომ მის კონკურენტს პრობლემები შეექმნა. გამოდის, რომ ისინი წელს უფრო სუსტები არიან, ვიდრე შარშან", - განაცხადა ფრანგმა თავკაცმა.
შეგახსენებთ, რომ დღეს, ჩემპიონთა ლიგის მეოთხედფინალის ფარგლებში "ლურჯ-წითლები" საკუთარ კედლებში ლივერპულს დაუპირისპირდებიან. მერსისაიდელთა კარში იქნება გიორგი მამარდაშვილი, ლუის ენრიკეს გუნდში კი რუსი გოლკიპერი. ევროპის მთავარი საკლუბო ტურნირის მოქმედი ჩემპიონის მხრიდან მოედანზე ხვიჩა კვარაცხელიაც გამოჩნდება.
