საქართველოში ავტოსპორტი, განსაკუთრებით დრიფტი ყოველწლიურად ვითარდება და ახალ ეტაპზე გადადის. მათე როჭიკაშვილი ერთ-ერთი ყველაზე გამორჩეული ქართველი პროფესიონალი დრიფტერია, რომელიც ავტოსპორტით ბავშვობაში მოიხიბლა და კარიერა 2018 წელს დაიწყო. LaGazzetta.ge მათეს დაუკავშირდა და საინტერესო თემებზე ესაუბრა.
- პირველ რიგში მადლობა ინტერვიუსთვის. როდის დაინტერესდი პირველად მანქანებით და ავტოსპორტით?
"ზოგადად ავტომობილებისადმი და ავტოსპორტის ინტერესი ბავშვობიდანვე მქონდა და როდესაც საშუალება მეძლეოდა, ყოველთვის ამ სფეროს ვუთმობდი დროს. ვცდილობდი, რომ მომეძიებინა შეჯიბრებები, რომლებიც საქართველოში ტარდებოდა და ჩემს მშობლებს წავეყვანე, რაც უდიდეს სიამოვნებას მანიჭებდა. ყოველთვის ვფიქრობდი, სრულწლოვანი როდესაც გავხდებოდი რომელ მანქანას ვიყიდდი — ჩემი ბავშვობის ოცნების ავტომობილები BMW E46 და Subaru Impreza იყო."
- როგორ და როდის დაიწყო შენი პროფესიონალური კარიერა დრიფტში და რა იყო პირველი ნაბიჯები?
"ჩემი კარიერა დრიფტში 2020 წელს დაიწყო, როდესაც პირველი დრიფტის ავტომობილი შევიძინე, ხოლო მომდევნო წელს გამოვედი საქართველოს დრიფტის ჩემპიონატზე ნახევრად პროფესიონალურ კლასში. 2021-22 წლებში ნახევრად პროფესიონალურ დრიფტში ვიღებდი მონაწილეობებს, ხოლო 2023 წელს გადავწყვიტე, რომ უკვე მქონდა საჭირო უნარები და პროფესიონალურ კლასში ჩავები."
*საქართველოს დრიფტის სერიები 2024, პირველი ეტაპი
- მოგვიყევი შენი ტიტულების და გამარჯვებების შესახებ ავტოსპორტში
"გამოვდივარ ნებისმიერ შეჯიბრებაში, რაც დაკავშირებულია ავტომობილებთან ან მოტოციკლებთან და ჩემი კარიერა მხოლოდ შრიფტით არ შემოიფარგლება. ჩემი პირველი წარმატებად იყო 2018 წელს, როდესაც მოტოციკლეტების დრაგის ჩემპიონატზე მეორე ადგილი დავიკავე და პოდიუმზე მოვხვდი. შემდეგ კი დრიფტში ჩავები და არაერთი ტიტული მოვიპოვე. გამარჯვებები მაქვს მოპოვებული ნახევრად პროფესიონალურ კლასში და ვარ King of Drift-ის რამდენიმე წლის ვიცე-ჩემპიონი. ასევე გამარჯვებები მოვიპოვე უხეშ დრიფტზე და სხვა არაერთ შეჯიბრებებზე."
"2023 წელს, სომხეთში დრიფტის ბოლო ეტაპი მოვიგე, რაც ჩემთვის პირველი გასვლითი ტურნირი იყო. ბოლოს კი, საქართველოს დრიფტის ჩემპიონატის ეტაპის გამარჯვებული გავხდი. Subaru Impreza-თი გამოვდივარ წყვილთა რბოლაზე, სადაც ასევე 10-ზე მეტი პოდიუმი მაქვს."
- სულ ცოტა ხნის წინ კარიერაში პირველად გახდი საქართველოს დრიფტის ჩემპიონატის ეტაპის გამარჯვებული. რას ნიშნავს ეს გამარჯვება შენთვის, როგორც პროფესიონალი დრიფტერისთვის?
"ნამდვილი დრიფტერები ყოველთვის ვცდილობთ, რომ ყველაზე რთულ გამოწვევებს შევეჭიდოთ და ასეთია საქართველოს დრიფტის ჩემპიონატი, სადაც მონაწილეობას ყველაზე ძლიერი დრიფტერები იღებენ. შევძელი და საქართველოს ყველაზე რთულ შეჯიბრებაზე და ძალიან ჩქარ ტრასაზე გავიმარჯვე. ეს დრიფტერისთვის ყველაფერია, რადგან ყოველთვის მაქსიმუმს ვაკეთებთ პოდიუმზე მოსახვედრად."
*საქართველოს დრიფტის სერიები 2025, მეორე ეტაპის პოდიუმი
- მიუხედავად იმისა, რომ 2025 წლის დრიფტის სერიების პირველ ეტაპზე ვერ მიიღე მონაწილეობა, ორი ეტაპის შემდეგ საუკეთესო ხუთეულში ხარ და ჩემპიონობისთვის იბრძვი. რას იტყვი წლევანდელ შეჯიბრებაზე და როგორ შეაფასებ კონკურენტებს?
"დიახ, მიუხედავად იმისა, რომ პირველ ეტაპზე მონაწილეობა ვერ მივიღე, მეორე ეტაპის კვალიფიკაციაზე საკმაოდ კარგი პოზიცია დავიკავე, ხოლო უშუალოდ შეჯიბრება მოვიგე, რეიტინგში მე-5 ადგილზე ვარ და ჩემპიონობისთვის ბრძოლის შანსი მაქვს. რა თქმა უნდა მთელი წელი მაქსიმალური შემართებით ვიქნებით და ყველაფერს გავაკეთებთ, რომ ჩემპიონობა არავის დავუთმოთ."
"ძალიან ძლიერი კონკურენტები გვყავს, რომლებიც ძლიერი მანქანებით ასპარეზობენ და ზუსტად ეს ქმნის იმ დაძაბულობას და სანახაობას, რაც საქართველოს დრიფტის სერიებს აქვს."
- როგორ ვითარდება ქართული ავტოსპორტი შენი პირველივე ნაბიჯებიდან დღემდე და რა აკლია აღნიშნულ სპორტს უფრო მეტად განვითარებისთვის?
"რა თქმა უნდა ქართული ავტოსპორტი ვითარდება, რასაც პირველ რიგში ხელს იმ მრბოლელების განვითარება უწყობს, რომლებმაც საზღვარგარეთ გამოცდილება მიიღეს და საქართველოში დაბრუნდნენ. ქართული ავტოსპორტის უფრო მეტად განვითარებისთვის უმნიშვნელოვანესია ის ფაქტი, რომ კომპანიები გვერდში დაგვიდნენ და სანახაობრივი ივენთები კიდევ უფრო შთამბეჭდავი და მასშტაბური გავხადოთ."
- დრიფტის გარდა, დრაგის სერიებშიც იღებ მონაწილეობას და 2025 წლის პირველი ეტაპის გამარჯვებული გახდი. რა ავტომობილით მოიგე შეჯიბრება და როგორ ემზადებოდი?
"დიახ, 2025 წლის დრაგის სერიების პირველი ეტაპის გამარჯვებული გავხდი, სადაც მონაწილეობა 2024 წლის chevrolet corvette c8-ით მივიღე, რომელიც აღჭურვილია 6,2 ლიტრი მოცულობის ატმოსფერული ძრავით. ძალიან საინტერესოა ის ფაქტი, რომ ავტომობილი იყო სრულიად ქარხნული. რა თქმა უნდა დრაგზე უმნიშვნელოვანესია საბურავები და ჩვენც რუსთავის საერთაშორისო ავტოდრომისთვის იდეალური საბურავი შევარჩიეთ, რამაც შედეგი მოგვცა. გვინდოდა დაგვემტკიცებინა ის, რომ თანამედროვე ავტომობილებს, თუნდაც არც თუ ისე მაღალი სიმძლავრით, შეუძლიათ 402 მეტრის მოკლედ დროში დაფარვა."
"ფინალში მოხდა ძალიან საინტერესო ფაქტი — ჩემს ავტომობილს ორივე გარბენზე ჰქონდა იდენტური, 11,627 წამიანი შედეგი, რაც ადასტურებს იმას, რომ თანამედროვე მანქანები იდეალურად და თანაბრად მუშაობენ."
- რა არის მომზადების პროცესში ძირითადი განსხვავება დრიფტსა და დრაგს შორის?
"ეს ყველაფერი პირველ რიგში მრბოლელზეა დამოკიდებული თუ როგორ მიუდგება ავტოსპორტის ამ ორ განსხვავებულ სახეობას. მე პროფესიონალი დრიფტერი ვარ და რა თქმა უნდა, ჩემთვის პირველ რიგში დრიფტია. აქედან გამომდინარე, დრიფტის შეჯიბრებისთვის მომზადებას საკმაოდ დიდი დრო და ფინანსები ჭირდება. სანამ უშუალოდ შეჯიბრებაზე გავალთ, გვიწევს, რომ ავტომობილი თავიდან ბოლომდე გადავამოწმოთ, რადგან დრიფტის დროს მანქანას ძალიან დიდი დატვირთვა აქვს. ასევე გვჭირდება ძალიან ბევრი საბურავი. დრაგზე დიდ ენერგიას არ ვდებთ და ზუსტად ამიტომ გამოვედით ქარხნული ავტომობილით, რომელზეც მხოლოდ საბურავები შევცვალეთ."
"ეს ყველაფერი მხოლოდ ჩემს შემთხვევას მოიაზრებს და არიან მრბოლელები, რომლებიც დრაგისთვის დღეს და ღამეს ათენებენ და მანქანას ყოველდღიურად ხვეწავენ."
- რას გეგმავ მომავალში? არის თუ არა მიზანი საერთაშორისო შეჯიბრებებში მონაწილეობა და რა არის ამისთვის საჭირო?
"მომავალში ვგეგმავ კვლავ მივიღო მონაწილეობა საქართველოს დრიფტის სერიებზე და King of Drift-ზე და ჩემს თავთან ერთად ჩემი ავტომობილიც უფრო მეტად დავხვეწო. რა თქმა უნდა ყველა ქართველი დრიფტერისთვის მიზანი საერთაშორისო შეჯიბრებებზე გასვლაა და ამისთვის უნარების და ავტომობილის დახვეწის გარდა, საჭიროა კომპანიების გამოჩენა, რომლებიც გვერდში დაგვიდგებიან. ამ ყველაფრის შემდეგ შევძლებთ საქართველოს სახელის გატანას საერთაშორისო ასპარეზზე."
- და ბოლოს, რას ეტყოდი მათ, ვინც დრიფტით არის დაინტერესებული და პირველ ნაბიჯებს დგამს აღნიშნულ სპორტში?
"ყველას, ვინც დრიფტში პირველ ნაბიჯებს დგამს ვურჩევდი, რომ პროფესიონალ დრიფტერებთან გაიარონ კონსულტაციები თუ რა ავტომობილი შეიძინონ, როგორ მოამზადონ, სად და როგორ ივარჯიშონ და ა.შ. მათი უკეთ განვითარებისთვის კარგი იქნება პროფესიონალების რჩევები. რა თქმა უნდა ჩვენ ყველას დავეხმარებით და ისე ვიზამთ, რომ დრიფტი შეუყვარდეთ და განვითარების მოტივაცია ჰქონდეთ."
