საქართველოს 21-წლამდელთა ნაკრებმა ევროპის ჩემპიონატზე ასპარეზობა პოლონეთის ეროვნულ გუნდთან გამარჯვებით (2:1) დაიწყო. "ჯვაროსნების" შემდეგი მეტოქე იქნება საფრანგეთი, რომლის შემადგენლობა აღნიშნულ ტურნირზე ერთ-ერთი ყველაზე ვარსკვლავური არის.
"მამლების" მხრიდან პირველ რიგში გამოსარჩევია კასტელო ლუკება, რომელიც 40 მილიონი ევროთი ჩემპიონატის ყველაზე ძვირადღირებული უკანახაზელი არის. ფრანგმა ფეხბურთელმა გიორგი მიქაუტაძის მსგავსად პირველი ნაბიჯები გადადგა ლიონის აკადემიაში, რომელშიც ის 2011-2021 წლებში ვარჯიშობდა.
"ლურჯების" ახალგაზრდული ნაკრების ცენტრალურმა მცველმა შემდეგი ორი სეზონი გაატარა ოლიმპიკის მთავარ გუნდშიც, მოგვიანებით კი ის ლაიფციგში გაიყიდა. ცნობისთვის, 22-წლის უკანახაზელს 1 შეხვედრა დიდიე დეშამის გუნდშიც აქვს ჩატარებული. 14 ივნისს ის "ჯვაროსნების" შემტევებს დაუპირისპირდება.
რაც შეეხება ჯგუფური ეტაპის პირველ ტურს, ჟერალდ ბატიკლის გუნდმა ითამაშა უგოლო ფრე პორტუგალიის ნაკრებთან და საინტერესოა, რომ ყველაზე მაღალი შეფასება იმ შეხვედრაში სწორედ ლუკებამ მიიღო. ახალგაზრდა უკანახაზელს დაუწერეს 8.5, ჯერჯერობით ყველაზე მეტი ევრო 2025-ზე.
