„პასუხისმგებლობას ვიღებ კლუბზე მისი გულშემატკივრების, პერსონალისა და ფეხბურთელების წინაშე. ჩემი და ჩემი გუნდის მიზანია, მივაღწიოთ გრძელვადიან წარმატებებს როგორც მოედანზე, ასევე მის ფარგლებს გარეთ. გვსურს ფინანსურად მდგრადი კლუბი ავაშენოთ. ჩვენ მზად ვართ, აკადემია შემდეგ ეტაპზე გადავიყვანოთ, რომელიც იქნება ჩვენი გრძელვადიანი სტრატეგიის მნიშვნელოვანი ნაწილი. მოუთმენლად ველი ფანებთან შეხვედრას, რადგან კლუბი ერთად უნდა გავაძლიეროთ“, – მიხეილ ლომთაძე.
საფეხბურთო კლუბი უიკომბ უონდერერსი 1887 წელს დააარსდა. ამჟამად გუნდი ინგლისის ლიგა 1-ში ასპარეზობს, რომელიც რანგით მესამე დივიზიონია. უიკომბმა სეზონი მე-10 პოზიციაზე დაასრულა.
როგორც ცნობილი ხდება, კლუბის პრეზიდენტად კვლავ რობ კუგი დარჩება, რომელიც კლუბს 2020 წლიდან ფლობდა.
მიხეილ ლომთაძე ბათუმში 1975 წლის 17 ოქტომბერს დაიბადა. ბაკალავრის ხარისხი თბილისში, საქართველოს მენეჯმენტის ევროპულ სკოლაში მიიღო, შემდეგ კი სწავლა აშშ-ში, ჰარვარდის ბიზნეს სკოლაში განაგრძო და 2002 წელს სწავლა MBA აკადემიური ხარისხით დაასრულა.
Forbes-ის 2024 წლის მილიარდერების სიის მიხედვით, 48 წლის ქართველი ბიზნესმენი, 581-ე ადგილს იკავებს. მისი ქონების ღირებულება $5.2 მილიარდს შეადგენს.
ლომთაძე ყაზახური საფინანსო ტექნოლოგიური კომპანიის, Kaspi-ს მმართველი საბჭოს ხელმძღვანელი და კომპანია Kaspi Bank-ის ერთ-ერთი მფლობელია. Kaspi ყაზახეთის უდიდესი საფინანსო სერვისების მიმწოდებელი კომპანიაა, რომელსაც 18.5-მილიონიანი მოსახლეობიდან 7 მილიონზე მეტი მომხმარებელი ჰყავს.
LaGazzetta.ge ელოდება კლუბის კომენტარს, რომელსაც მალე შემოგთავაზებთ.
