უნგრეთის დედაქალაქ ბუდაპეშტში წყალში ხტომის საერთაშორისო ტურნირი გაიმართა. ტურნირში საქართველოს ნაკრები ხუთი სპორტსმენით იყო წარმოდგენილი. ქართველმა წყალში მხტომელებმა ასპარეზობა ექვსი მედლით დაასრულეს, აქედან ორი ოქროს, ერთი ვერცხლისა და სამი ბრინჯაოს მედალია.
სამმეტრიანი ტრამპლინიდან სინქრონულ ხტომებში გიორგი წულუკიძემ და ალექსანდრე ცხომელიძემ 251 ქულით ტურნირის ჩემპიონობა იზეიმეს.
სამმეტრიანი ტრამპლინიდან ხტომაში ალექსანდრე ცხომელიძე 444,80 ქულით ჩემპიონი გახდა, გიორგი წულუკიძე 444,20 ქულით - ვიცე-ჩემპიონი, ხოლო კოკა საკანდელიძე 437 ქულით ბრინჯაოს მედალს დასჯერდა.
ერთმეტრიანი ტრამპლინიდან ხტომაში კი თეკლა შარია 212 ქულით და თორნიკე ონიკაშვილი 293 ქულით ბრინჯაოს პრიზიორები გახდნენ.
