გიორგი ქოჩორაშვილი ლისაბონის სპორტინგში გადავიდა. საუბარია გუნდზე, რომელიც ჩემპიონობების რაოდენობით (21), პრიმეირა ლიგაში მეზობელი ბენფიკასა და პორტუს შემდეგ, მე-3 არის. ამის გარდა, "ლომები" პორტუგალიაში მოქმედი 2-გზის ჩემპიონები არიან.
ჟოზე ალვალადეს ბინადრების მიმართებაში ყველაზე გამოსარჩევი არის არა ტიტულები, არამედ ის, თუ რა ფეხბურთელები აჩუქეს მათ საფეხბურთო სამყაროს. სპორტინგის აკადემია გამოიარეს ლუიშ ფიგუმ, კრიშტიანუ რონალდუმ, რიკარდო კუარეშმამ, ლუიშ ნანიმ, რაფაელ ლეაომ, ნუნო მენდეშმა და კიდევ ბევრმა.
ლისაბონში არაერთი გამორჩეული ლეგიონერიც ყოფილა, მაგალითად - მარიო ჟარდელი, ერიკ დაიერი, რაფინია ბელოლი, მანუელ უგარტე, პედრო პორო და სხვები. ბოლოდროინდელი ვარსკვლავებიდან აუცილებლად უნდა ითქვას ვიქტორ გიოკერეში, რომელიც კარიერას დიდი ალბათობით ლონდონის არსენალში გააგრძელებს.
"ლომებში" გაბრწყინება არ არის მხოლოდ დამწყები ფეხბურთელების ხვედრი, მაგალითად, ბრუნო ფერნანდეში იყო 24 წლის, როდესაც ის მანჩესტერ იუნაიტედში გადადიოდა. ზემოთხსენებული შვედი ფორვარდი კი "მეთოფეების" შემადგენლობაში ტრანსფერის მომენტისთვის 27 წლის არის.
ვნახოთ, რით დაგვამახსოვრებს თავს ჟოზე ალვალადეზე ქართველი ნახევარმცველი. იქნება ეს მისთვის ტრამპლინი უფრო დიდ გუნდში თუ კარიერის საუკეთესო ეტაპი. აქვე დავამატებთ, ლევანტეს ექს-შუახაზელის ტრანსფერი რუი ბორჟესის გუნდს 5.5 მილიონი ევრო დაუჯდა.
