2027 წლის რაგბის მსოფლიო თასის წილისყრა დასრულდა და 24 ნაკრები 4 ჯგუფში გადანაწილდა, საიდანაც საუკეთესო 16 პლეი-ოფში გავა.
საქართველოს ეროვნული ნაკრები B ჯგუფში მოხვდა, სადაც სამხრეთ აფრიკას, იტალიას და რუმინეთს დაუპირისპირდება. LaGazzetta.ge-სთან საქართველოს რაგბის კავშირის პრეზიდენტმა, დავით კაჭარავამ და მაღალი მიღწევების დირექტორმა, ლევან მაისაშვილმა წილისყრა შეაფასეს.
ლევან მაისაშვილმა აღნიშნა, რომ ბორჯღალოსნებს მთავარი მატჩი იტალიასთან ექნებთ და პროგრამა მინიმუმი ჯგუფიდან გასვლაა.
"ვფიქრობ, რომ ჩვენთვის კარგი ქვეჯგუფია. სამწუხაროა, რომ იაპონიასთან ფაქტობრივად შემობრუნებული და მოგებული თამაში ბოლო წუთზე დავთმეთ, რითაც მესამე კალათში აღმოვჩნდით წილისყრაზე. მეორე კალათიდან გაცილებით მეტი შესაძლებლობა გვეძლეოდა ჯგუფიდან გასასვლელად. თუმცა დღევანდელი შედეგით ვთვლი, რომ ჩვენთვის კარგი ჯგუფია და კარგი მოცემულობა იმისათვის რომ ჯგუფიდან გავიდეთ."
"ყველასათვის გასაგებია, რომ აფრიკა არა მარტო ჩვენთან, მსოფლიოში ყველა გუნდის წინააღმდეგ ფავორიტია. რაც შეეხება იტალიას - მიუხედავად მათი წარმატებებისა, ბოლო ორი თამაშიდან ერთი მოვიგეთ და მეორე თამაში გასვლაზე სერიოზულ წნეხში ვამყოფეთ. იქაც სამწუხარო მარცხი განვიცადეთ. დარწმუნებული ვარ მათ უფრო მეტი წნეხი უნდა ჰქონდეთ ჩვენ წინააღმდეგ, ვიდრე ჩვენ. ასე რომ ჩვენი მიზანი არ იცვლება და ჯგუფიდან გასვლა პროგრამა მინიმუმი უნდა იყოს ჩვენთვის" - ლევან მაისაშვილი.
დავით კაჭარავამ აღნიშნა, რომ ბორჯღალოსნებისთვის მსოფლიო თასზე იტალიასთან მატჩი ყველაზე დიდი გამოცდა იქნება.
"ვფიქრობ, რომ ჩვენი გუნდისთვის იღბლიანი წილისყრა იყო. პირველ რიგში სამხრეთ აფრიკა, რომელიც მოქმედი ჩემპიონი და რეიტინგის პირველი ნომერია და სასიხარულოა, რომ ასეთი დონის გუნდთან მოგვიწევს თამაში."
"მეორე იტალია, რომელიც ჩვენთვის ძალიან პრინციპული მეტოქეა და ბოლო ორი მატჩიდან ერთი მოვიგეთ და ერთი დავთმეთ. ჩვენს საზოგადოებას აქვს განცდა, რომ 6 ერშია ჩვენი ადგილი და პირდაპირი კონკურენტი სწორედ იტალიაა. მე არ ვფიქრობ, რომ ტურნირი რომელიმე გუნდმა უნდა დატოვოს, პირიქით, უნდა გაიზარდოს და 6 ერს საქართველოს ნაკრები დაემატოს. იტალია ბოლო პერიოდში დიდ პროგრესს განიცდის, მაგრამ მათ მსოფლიოზე არასდროს შევხვედრილვართ და ვნახოთ, ეს იქნება უდიდესი გამოცდა ქართული რაგბისთვის.""რაც შეეხება რუმინეთს - ის ჩვენთვის ტრადიციული მეტოქეა და აქ ახალი არაფერია. ჩვენ ვიბრძოლებთ ჯგუფში მეორე ადგილისთვის- პლეი-ოფში გასვლა ქართული რაგბის ისტორიისთვის ახალი ფურცელი იქნება და კარგად მოსამზადებლად წელიწადნახევარი გვაქვს" - დავით კაჭარავა.
2027 წლის მსოფლიო ჩემპიონატს ავსტრალია უმასპინძლებს და მატჩები 6 სხვადასხვა სტადიონზე ჩატარდება. ტურნირი სტარტს 1 ოქტომბერს აიღებს, გამარჯვებული კი 13 ნოემბერს გამოვლინდება.
